Per Nozze (Gustoso arditissimo)
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Torna la moda del Cavalier Servente | Edission e fonte ▼ | Per nozze Ernesto Chiarion-Casoni e co. Emma Baglioni → |
Gustoso arditissimo
Prontà avea un soneto
Ma andar da lontan
El perde el so efeto.
El gera el più semplice
Per questo bel zorno
Ma assente el poeta
Nol conta più un corno,
O sposi carissimi
Per ciò compatì
Che tuta la colpa
No xe po' de mi.
De scriver in epico
Avea provà
Sicome el mio solito
Co' gran verità.
Per cui son sensibile
Se dopo sto caso
Che par incredibile
Adesso mi taso.....
Voleu quatro ciacole?
Lo credo anca mi
Le xe indispensabili
In tanto bel dì.
Ma za ghe xe un diambarne
Che à messo la còa
Che fa no se drizza
Al porto la proa.
Ma mi me ribelo
Me volto a sta tosa
Co' fervido augurio
Datà per 'na sposa.
E al so inseparabile
Grazioso mario
Che gà destinȧ
El nostro bon Dio.
Che fresco e po' vegeto
El resta per ela
Za ch'elo possiede
Doneta sì bela...
Ancuo in mezo al giubilo
Che invita a l'amor
A tutti è permesso
De verzer el cuor.
Vedè dunque amabili
Graziose putele,
Vedè quei do bocoli
Vedè quele stele,
Per eli credemelo
Per eli è sta festa
Che i so genitori
Per lori à volesta.
Via dunque, via subito
Corè drio de mi
A farghe alegría
In tanto bel dì.
Vedeù quele amabili
Graziose sembianze
No ghe da confonderse,
Fra tante pietanze,
Vedè quei do lucidi
Carboni che splende
Che pronti i ve indica
Che i compra e no i vende.
E quela simpatica
Vezzosa maniera
Che fato ga un idolo
De Toni quà in tera.
Vedè.... via disemelo,
Dipinti i afeti
In lori chiarissimi
E sempre più schieti.
Quei lavri che interoga
Co' somo talento....
In sto sposalizio
Via tuto ghe drento.
Ghe insoma un scambievole
Compenso a l'amar
De do che fedeli
Xe andadi al'altar.
Ghe xe splendidissima
Fra mezo ai dileti
Fortuna invariabile
Scambievoli afeti.
Ghe Nane che intrepido
E po' so mugier,
Che amira sti tosi
E sente piaser.
Ghe tuti che pregi
Ghe trova a sti puti
Assai inumerevoli
Che po' no ga tuti.
Per cui mi incontrandome
Co' altri in sta idea
Fasendo l'elogio
Che tuto me bea,
Se tanta acoglienza
La mà sbalordìo,
Ze giusto che ciacola
Ne torna più indrio.
E ai sposi solecito
Mi deva augurar
Salute dolcezze
E quanto pol dar.
L'amor fervidissimo
Unido al rispeto
Che m'à sugerido
Sto breve soneto.
Per cui presentandolo
A vualtri de cuor
Concludo solecito
Co' tuto l'amor:
Evviva o carissimi
Sposini beati
Ve sia questo zorno
Dei più fortunati.
E un dì ricordandove
Fra mezo al piacer
Ve vegna in memoria
L'amigo ingegner.