Tognon

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
←  Canzonetta libera per musica Edission e fonte ▼ Lettera alla Marietta  →
[p. 25 modifica]
NOVELLA


Tognon.


Musa no ghe abadar! zà tuti sà
     Che de Apolo compagna no ti xè
     Che sede sul Parnaso no ti gà
     Che no ti canti mai ne in dò, nè in rè,
     Che messa a la Carlona, e in libertà
     No ti porti strighezzi ne bonè,
     Che averta de natura, e de bon cuor
     Ai leterati no ti vol impor.
Se del to Sborio alcuni à dito mal
     In confronto dei più che à dito ben
     No crédere per questo senza sal
     E mola alegramente quel che vien,
     Sto mondo xè de mati un'ospeal,
     Chi vede scuro scuro, e chi seren,
     E chì blatera più xè aponto chi
     Perde contando i travi tuto el dì.
Xè un'ora, e forsi più che al mio taolin
     Stago aspetando co la pena in man
     Che ti me meti in scena un contadin
     Unico fio de Marta e de Bastian
     Che a Sborio conza pote, e berechin
     Tanto de somegiarghe xè lontan
     Che a consultar el medico l'è andà
     El primo dì che el cazzo gà tirà.

[p. 26 modifica]

D'inocenza belissima virtù
     Ah che me vien deboto da fifar
     Co penso che inghiotìa da Belzebù
     Ti è andada proprio a farte buzerar!
     E son pronto a scometer che dai più
     Se crederà che vogia minchionar
     Cantando la storieta de Tognon
     Nel fior de la so età tanto cogion.
El bravo mio Turpin pretende e vol
     Che in pase veramente patriarcal
     Stasse co Marta, e co Bastian sto fiol
     (Sinonimo perfeto de un Bocal)
     In Caseta de pagia che dal sol
     Scodeva un bel saludo matinal
     E serviva in genaro da camin
     A sto povero terno contadin.
Per parentesi musa mando al diavolo
     Sta desinenza in tronco tropo stitica,
     E con più libertà la rima intavolo
     Parte per estro, e parte per politica,
     Che in fondo za no me ne importa un cavolo
     Se qualche caga dubi e ride e critica,
     Fala con mì chi la vol far da oracolo
     E meter in caena el mio vernacolo.
De Marta e de Bastian soto la cura
     Sui disdot'ani deventà colosso
     Gera proprio Tognon fio de natura,
     Me spiego megio, aseno grando e grosso,
     Testa da palamagio e cussì dura
     Che in falo al bianco, el ghe diseva rosso,
     Ma de pasta per altro tanto bona
     Che i so compagni che diseva el Mona.

[p. 27 modifica]

Gusti predominanti de sto Dugo
     Gera el sgnaolar da gato el far da can
     El perderse de l'ore senza sugo
     Zogatolando con un grilo in man
     Cufularse in tei fossi, e in quel pachiugo
     Impastar co la crea polpète e pan,
     Chiapar le mosche in aria, e mastrussae
     Darghele ai ragni in mezzo a le piantae.
Soto la coa del porco, e del cavalo
     (Recordeve i disdoto) sul più belo
     Consegnarghe in tel culo un scarcavalo
     Che neto neto ghe brusava el pelo,
     Meterse fra le gambe un legno, un palo
     E corer per i prai come un putelo,
     Serar i ochi e caminar a scuro
     E romperse la testa contro el muro.
Mato gera Bastian per sto bel fio
     Unico fruto del so casto leto,
     Che fora de mostrarse tanto indrio
     In fato de svilupo, e de inteleto
     Gera per altro nel timor de Dio
     (Recordeve i disdoto) un anzoleto,
     A segno tal che subito el ſifava
     Se mai Bastian per storto lo vardava.
E gera zà da un ano solamente
     Che Marta braghessona (inquieta assae
     De veder che sto sempio bon da gnente
     Perdeva tuto el zorno in putalae)
     La gavea desmesso per la zente
     De darghe al so Tognon le sculazzae,
     Anca perchè cressendo a vista d'ochio
     El ghe pesava tropo sul zenochio.

[p. 28 modifica]

Nessuna meravegia in conseguenza
     Che stampà da natura visdecazzo
     El fior batesimal de l'inocenza
     Ghe rida ancora in braghe a sto regazzo,
     Che nol conossa i nomi de semenza,
     De mona, de testicoli e de cazzo,
     E che solo creà per far pissin
     El creda in bona fede el so bimbin.
Ma un zorno de gran caldo che puzà
     A l'ombra de un salgher per destracarse
     Dai soliti sempiezzi, el gera là
     Per andar via col sono, e rinfrescarse
     El sente (indovinè che novità!)
     Indurirse el negozio, e tanto alzarse
     Ch'el se mete una man sora el portelo
     Calcolando un fenomeno l'oselo.
Anzi ne la so prima confusion,
     Suponendo ch'el sia qualche anemal,
     El desbotona in pressa el patelon
     E tanto el tira ch'el se fa del mal,
     Ma de pararlo via no essendo bon
     Ghe nasse in testa el dubio natural
     Che per qualche improvisa malatia
     L'abia alterà la so fisonomia.
Tremante el mio Tognon no sà per cossa
     Più ch'el varda, ch'el tasta e ch'el carezza
     Più furente de rabia el se ghe ingrossa
     Più l'acquista del marmo la durezza,
     E tanto el manda in sù la testa rossa
     Che sie dei sul bonigolo el se drezza,
     (Misura da campagna) e benchè mona
     Tognon col cazzo in man cussì ragiona.

[p. 29 modifica]

Che prodigio xè questo? in sta maniera
     Un pezzo de carnazza, un slambrichioto
     Che me serviva per pissar in tera
     In gringola se mete, in estro, in moto?
     E deventà serpente, e quasi fiera
     Me cambia de natura sui disdoto
     E più che me lo tasto el me dà suso
     El me fa colo, e par ch'el mostra el muso?
M'alo da star cussì? xelo un castigo?
     Xelo efeto de qualche strigheria?
     Come farogio a sconderme l'amigo
     Se el se me slonga ancora de sta sia?
     Ah povereto mì! che bruto intrigo?
     E pur dubio no gh'è... l'è roba mia
     L'è lù.... che quà no vien roba foresta
     Ma come mai?... me romperia la testa.
Sempre quieto l'è stà come una pua
     Contento de dormirme in patelon,
     Per cossa farme adesso sta cressua?
     De cambiarme cussì no gh'è rason,
     Donca s'el buta bave, e se el se mua
     Nasse da qualche mal l'operazion,
     Sbrisserò dal dotor.... con un mieto
     Ghe consegno a Caroba sto pacheto.
De sti pensieri fra la bogiaizza
     Col so negozio a l'aria el mio Tognazzo
     Per consultar el medico el se izza
     E ancora megio ghe dà suso el cazzo,
     Tavanà dal contrasto e da la pizza
     El vol parar in cheba el so oselazzo,
     Ma co le braghe basse no gh'è verso,
     Ghe ne vien fora un quarto dal traverso.

[p. 30 modifica]

Sior Antonio Caroba un mio distante
     Gaveva casa in centro del vilagio
     Unito in matrimonio co Violante
     Maschiota alegra, e carne de bon tagio,
     Che stufa assae del ton grave e pedante
     Che gaveva el mario geloso e piagio
     Coi boconi robai se vendicava
     Del poco gusto ch'el dotor ghe dava.
Tognon se mete in viazzo el bate strada,
     Col cazzo sempre duro a mezza panza
     E co una ciera tanto scalmanada
     Ch'el muso ghe deventa una buganza;
     La so camisa strazza e taconada
     Se sbrega dal tirar, e l'increanza
     Gà el so cazzo rompendo una chiarela
     De mostrar fora neta la capela.
El se giusta a la megio, el tira a basso
     Più ch'el pol la giacheta, ma curtina
     E co le braghe de traverso basso
     No la ghe sconde l'arma contadina;
     Ma el povero Tognon incalza el passo,
     Co l'arma inviperia mezza in berlina,
     L'è zà a la porta, e tanto infurià el sona
     Che vien Caroba a dir, chi xè sto mona?
Ma bon omo de fondo, e conossente
     De Marta e de Tognon rusando un poco
     El ghe dise a Violante alegramente,
     Saveu chi sona? Indovinè! quel toco
     D'aseno de Tognon... che impertinente!
     L'aversa sior dotor; ziga el mio gnoco
     E a un strazzo de cordon tanto el se taca
     Che zogolo e batochio se destaca,

[p. 31 modifica]

Caroba averse in pressa. Per Dio Santo
     Co sto tiro ti vien, cossa è sta roba?
     To pare xelo forsi da agio santo? ―
     Mio pare sta benon dotor Caroba,
     Son mi che stago mal, ne l'è un impianto;
     Porco t'astù impestà, gastù la boba?
     Quel che mi gabia adosso no capisso
     So ben che stago mal dove che pisso.
E disendo cussì co la bereta
     Ch'el fufignava in man, e col capelo
     El coverze a la megio la zucheta
     Sinonimo in vernacolo d'oselo;
     Violante se ne acorse, ma da dreta
     Và via prudentemente dal tinelo
     E in sfesa de la porta a pian pianin
     La varda per de fora el pantomin.
Restà solo Tognon buta via tuto
     E al povero Caroba, che fornio
     Gera sta da natura de un persuto
     Scarso de dose, fiapo e ingritolio
     Senza riguardo ghe presenta el puto
     El so cazzo tirante e inviperio,
     Che ochià da la Mugier degno strumento
     El ghe par da lontan de torlo drento.
La varda sior Dotor che bisinela
     De malatia, dise Tognon, gò fora!
     Picolo el mio bimbin come un'anguela
     El m'à cressuo a sto Dio, xè più d'un'ora,
     La camisa, le braghe, e la portela
     Co le so furie el m'à mandà in malora
     Se nol me torna molo, sior Antonio
     Cossa gogio da far de sto Demonio?

[p. 32 modifica]

Al Dotor che sbalordio de quel ordegno
     (Che natura matrigna à sempre dà
     In proporzion inversa de l'inzegno
     Compensando cussì chi no ghe n'à)
     Ghe salta l'estro de tor suso un legno
     Per farghelo calar come che và,
     Ma consultando megio la prudenza
     El rispeta del gonzo l'inocenza.
E palpandoghe ben da l'alto al basso
     Quel imenso Oselon da galeria
     Che zà continua a farla da gradasso
     Per cresserghe al Dotor l'ipocondria,
     E duro più d'un marmo e più d'un sasso
     Par che i tasti lo meta in alegria,
     El ghe dise a Tognon, lasselo quieto
     Che no l'è che un riscaldo te prometo.
No far chiacole, tasi e per adesso
     Tirete su le braghe, e no tocarte:
     Ti gà un poca de flogosi nel sesso,
     Ma l'acqua fresca basta per sanarte;
     Co l'acqua el calerà, sguazzite spesso
     E se el torna cussì, torna a sguazzarte.
     L'acqua stua tuto, ti gà tropo fogo
     In do o tre volte el tornerà a so logo.
Violante calda assae del contrabando
     Leva a sto passo da la sfesa el naso
     In testa un bel progeto ruminando
     Per meterse quel bocolo nel vaso.
     Sconde Tognon le furie del so Orlando
     Ma de sconderle a fato no gh'è caso
     Che indurio come un chiodo su la panza
     Gnanca dopo el consulto el gà creanza.

[p. 33 modifica]

Va via Tognon, ma sior Antonio in dolo
     Spesso co la Mugier per la rason
     Che l'ingegno gà sempre el cazzo molo
     In confronto del cazzo de un cogion,
     Co Violante restà da solo a solo
     No ghe nomina gnanca quel cazzon,
     Perchè no ghe nassesse el bruseghin
     De guarir a le preste el contadin.
Tase Violante, dreta come un fuso
     Ma l'idea de quel cazzo formidabile
     Tanto ghe scalda, e ghe tormenta el buso
     Che la vede in Tognon fin de l'amabile
     Prerogativa fra le vache in uso
     De giustar costo merito palpabile
     I roversi de certi fotidori
     Che xè, no se sà come, robacuori.
Trota intanto Tognon per la campagna
     E incontrando un'acqueta de sorgente
     Che forma un lago, e soto l'ombra stagna
     De un grosso castagner che ghe xè arente,
     El buta via le braghe, e drento el bagna
     Coi testimonj el capital furente;
     Ne de Caroba el gran rimedio fala
     Che a vista d'occhio in quel frescheto el cala
Se consola Tognon, che giusto vede
     El dotoral antidoto a la prova,
     E bigoto de fondo e pien de fede
     Un poco de miracolo el ghe trova;
     Ma per far sempre scantinar chi crede
     Un quarto d'ora dopo se rinova
     Coi sintomi de prima un tiramento
     Che fà cascar Tognon in svenimento.

[p. 34 modifica]

Fora de là casca Tognon in tera
     Un tiro de fusil distante apena
     Da la casa dei soi: ne l'alta guera
     Che ghe fa in braghe la so maschia antena
     (Imagineve amici che cagnera!)
     Ogni intopo la rompe e grossa e piena
     Sbregando el patelon senza modestia
     Minaciosa la fuma e la va in bestia.
De Tognon la solene stramazzada
     Vede Marta e Bastian, e più del pare,
     Come nasse in natura, desperada
     Core per darghe ajuto Dona mare:
     Sente Bastian de Marta una zigada,
     E chiamando in socorso un so compare
     Dal telegrafo in aria i vede in tre
     Che più assae del bisogno in vita el xè
A sto passo no vogio andar in longo
     Descrivendove Marta che ghe sconde
     Co la traversa al so Tognon el fongo,
     E Tognon rinvenuo che se confonde,
     Ma per vegnir al bon tiro de longo,
     E usando sempre de parole tonde
     Un riflesso farò da visdecazzo,
     Cioè che l'acqua no val co tira el cazzo.
E tanto no la val che sguazza ancuo
     Sguazza domani, capindo el mio marmota
     Che no xè operativo sto gran fruo
     Tre zorni dopo ghe vien sù la fota,
     E col so cazzo in aria a spron batuo
     Da novo a casa de Caroba el trota,
     Ma invece de Caroba domanda chi è
     Violante, e chi la sia zà savè.

[p. 35 modifica]

Violante che più calda de una gata
     No pol tegnir più in stropa la botega,
     Violante che d'amor zà mezza mata
     Con la man se consola e se la frega,
     Violante che de vederlo beata
     De no tornar indrio insiste e prega,
     E in cima de la scala in sta maniera
     Per tirarlo de sù la ghe fa ciera.
Vien pur suso Tognon, fra una mezz'ora
     Caroba m'à promesso de tornar;
     De quiete, poverazzo, nol gà un'ora,
     I lo fa tuto el zorno sgambetar;
     Ma s'el Dotor no gh'è, gh'è la Dotora,
     Me ne intendo anca mi, me so inzegnar,
     Sera la porta via, no far el muso,
     Destrighete putelo vien de suso.
Zà che non gh'è el Dotor, ripete el gnoco,
     Mi no fazzo le scale, la perdona,
     Figurarse!... mostrar... oh me la moco,
     A un'omo và ben tuto... ma a una dona...
     Violante che gà in testa quel bel fioco
     Se tien più che la pol de dirghe mona,
     Ma la core da basso, e pronta e acorta
     La dà col culo un gran seron de porta.
E chiapandolo dopo soto el brazzo
     La lo tira de suso, e la ghe dise,
     A Violante un de nò? vien qua furbazzo
     Che ti xè in bone man, le mie raise;
     E savendo che xè biava del cazzo
     Un per de tete bianche e ben divise
     Con arte la desponta el fazzoleto
     Per mostrarghe a Tognon el so bel peto.

[p. 36 modifica]

E vechia de mestier, e ingolosia
     De l'arma che faceva padiglion
     Col mio cuor, col mio ben, col vita mia
     La se strascina in camera el cogion,
     Che ripetendo và Gesù e Maria!
     La sarà brava, ma non ghe rason
     Che adesso meta fora la mia roba
     Se m'ò fatto pregar fin da Caroba.
Son pratica anca mì de medicina
     Son conossuda più de la gramegna,
     Tasto el polso, guarisso el mal d'orina,
     Le petechie, le piatole, la tegna;
     Se Caroba no pol, sera e matina
     De consultarme ognun me crede degna
     No me far l'ustinà, parla bel puto,
     Che te posso guarir, mostrime tuto.
D'Esculapio cussì sta nova luse
     Misciando i cocolezzi a l'impostura
     Co tanta furberia la se conduse
     Che vìtima Tognon de la bravura
     Del so cazzo a mostrar la lo riduse
     Su la panza in arcà la gran misura,
     Cressua visibilmente dal piacer
     De cascar ne le man de la mugier.
Violante ghe mor sù vedendo in bota
     Che strazzo de negozio gera pronto
     A versarghe a torenti ne la pota
     El netare d'amor: oh che pan onto!
     La dise tra de ela, ma la dota
     Continuando a far, el mal xè sconto
     La replica, infiammada xè la parte,
     Ma el pol venir a cao co un poca d'arte.

[p. 37 modifica]

Sta volta (caso novo) son afato
     Contraria a l'opinion de mio mario,
     El fresco, ti lo provi zà col fato
     A levarte la causa no à servio,
     Per condurtelo donca al primo stato
     Perchè nol torna subito indurio
     Credo che megio sia finchè l'è saldo
     Al fresco no, ma de cazzarlo al caldo.
In te l'acqua de bogio? ah no per baco
     Credela che brovar me vogia el picolo?
     Provar el mio Tognin? nò nò macaco,
     El rimedio no gà nissun pericolo,
     Via da bravo.... al dotor demoghe scaco,
     Vien quà ben mio, lo vedistu sto vicolo?
     Sta sfesa vogio dir, sto bel boscheto?
     Quà drento sì, quà drento gh'è el caldeto.
Natura che pò in fondo scozzonada
     Reclama i so diriti, tanto più
     Co la xè da un gran cazzo preparada
     Ghe spiega inalberà la so virtù,
     Persuade Tognon che una brovada
     Là no se arischiaria, e de pararlo sù
     El comincia a sentir qualche prurito
     Vedendoghe a Violante quel bel sito.
Violante che gà el sangue messo in moto
     Co tute dò le man (perchè no basta
     Una sola a chiaparghe el candeloto)
     Esamina a Tognon la parta guasta,
     E piena de lusuria per de soto
     Per de sora, per longo la lo tasta,
     E vien quà, la ghe dise, che l'è a tiro
     Vien quà, vissere mie, che me destiro.

[p. 38 modifica]

Trema Tognon, ma pur quel sen de late
     Che la fragola mostra, e dise toca,
     Quele cosse tornie, quelle culate,
     Quela cara selveta, e quela coca
     La so stupidità tante combate
     Che messo zà in azion pronto l'imbroca
     Ajutà da la man de chi xè cota
     El vestibolo primo de la pota.
Ai colpi smisurai de quel gran frulo
     Violante spaventade tira in drio,
     No aspetandose tanto, el so bel culo,
     E vinta dal dolor la ciga o Dio!
     Ma el cazzo de Tognon, cazzo da mulo
     Che i forieri del gusto à zà sentio
     No dà quartier, incalza l'argomento
     E quanto longo l'è tuto l'è drento.
Supia Tognon come un caval da monta
     Su la panza desteso de Violante
     Che dopo d'aver sorbio de la so ponta
     El dolor primo, dal piacer fumante
     Imperterita zà le furie afronta
     De quel cazzo indomabile e zigante
     Che nel tempio d'amor cerca el caldeto
     E và intanto sbregandose el fileto.
Violante mena i fianchi, e volta al cielo
     Do ochi stralunai che mostra quanto
     De Tognon la diverta el manganelo
     Che ghe consegna bote da ogio santo;
     De le panze in azion se basa el pelo,
     Scricola el canapè, sbroca l'incanto,
     E un miracolo xè se nol và in pezzi
     De sti dò desperai soto i strambezzi.

[p. 39 modifica]

Tognon fora de lù, vicine sente
     D'un piacer novo le delizie estreme,
     E come vol natura più furente
     L'incalza el pantomin, Violante zeme,
     Urla Tognon novizzo, e finalmente
     In barba de Caroba i versa insieme
     A torenti quel netare beato
     Che xè bruto a nasar, ma dolce in fato.
Quel netare che in mezzo a tanti mali
     De sta vita stendada e buzzerona
     Xè pur de gran conforto a nù mortali
     Co ne scalda la testa qualche dona,
     Che fra i gusti pochissimi reali
     In preferenza amar ne fa la mona,
     Sora quante ghe n'è bela parola
     Che risponde sonora e ne consola.
Co sta sgnesola in corpo de fotua
     Sul dubio che tornar possa el mario
     Da l'estasi Violante rinvenua
     Destrighete la dise, Tognon mio,
     Ti lo provi col fato se la stua
     Più assae de l'acqua fresca l'à guario
     S'ingana tuti, s'à inganà Caroba
     Ghe vol altro che fresco per la boba!
Ti geri marzo drento, e co l'azion
     E col caldo a le marze gò da moto,
     Che minaciando za l'infiamazion
     T'aveva fato saca per de soto,
     Ma el guarir co una sola operazion
     Saria, te l'assicuro un terno al loto,
     Basta se duro el te tornasse ancora
     A to disposizion xè la dotora.

[p. 40 modifica]

Finie cussì d'amor le baraonde
     Ne l'ato de giustarse la botega,
     Cossa gogio da dar? Tognon risponde,
     E Violante, monea de bona lega
     El to cuor ― el mio cuor? la me confonde
     Gnanca a una bestia el cuor non se ghe nega
     Se ghe n'avesse un par ghè li daria,
     Ma saldar vogio prima la partia.
Bezzi a Violante? cossa distu infame?
     Chi me tien scelerato de coparte?
     Fazzo el mestier per genio, e no per fame,
     Per carità lo fazzo, e no per arte,
     Vien pur franco da mi col to polame
     Se tornasse le marze a tormentarte,
     Co s'à chiapà la man, le vien zò presto,
     Can!... senza un baso ti me volti el cesto?
Tognon risponde suto come gnente
     Fusse a Caroba averghe fato un corno,
     Ma adesso vien el bon: per acidente
     Zorno de gran mercà gera quel zorno
     E in mezzo al tibidoi de tanta zente
     Tognon baucando a oselo molo intorno
     Tanto el se perde in viole ch'el se imbate
     Nel dotor che comprava dò pignate.
Oè! cossa fastu quà?, dise Caroba,
     A mezza vose, e in ton de cogionelo
     Te xela andada a segno quela roba?
     Galo giudizio pò quel to putelo? —
     Sì sì giudizio, m'è cressua la goba
     Tanto in sti zorni che so stà da elo
     Tognon responde, no xè gnanca un'ora
     E guai se no trovava la dotora. —

[p. 41 modifica]

La dotora? ― Violante so mugier —
     Mia mugier? ― So mugier per san Francesco
     Cossa t'ala mài fato? ― el so mestier,
     Me ghe lo messo al caldo e non al fresco,
     Al caldo come? ― Zà ch'el vol saver
     Più duro assae d'un granatier Todesco
     El gera co l'è entrà, ma grazie a Dio
     La m'à cavà le marze e son guario.
Caroba da sto fulmine copà
     Xè là per darghe in testa una pignata
     Ma l'idea de no far publicità
     Vendicando l'afronto de una mata
     Ghe tien el brazzo: a casa in bota el và.
     Nasse un'inferno, el fata el desfata
     Sona in boca al mario che la petufa
     Ma termina in sie zorni la barufa.
Violante cussì ben la ghe la intriga
     Che torna in bona fede el bon dotor,
     Ma de Tognon secretamente amiga
     La continua a cavarghele de cuor,
     Tognon capisse el rosto, e in quela figa
     Rafinando el talento fotidor,
     El perde tante marze, che deboto
     El ghe rimete vita e candeloto.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Tognon&oldid=58440"