Pagina:Poesie e satire di Pietro Buratti veneziano.pdf/27

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.
NOVELLA


Tognon.


Musa no ghe abadar! zà tuti sà
     Che de Apolo compagna no ti xè
     Che sede sul Parnaso no ti gà
     Che no ti canti mai ne in dò, nè in rè,
     Che messa a la Carlona, e in libertà
     No ti porti strighezzi ne bonè,
     Che averta de natura, e de bon cuor
     Ai leterati no ti vol impor.
Se del to Sborio alcuni à dito mal
     In confronto dei più che à dito ben
     No crédere per questo senza sal
     E mola alegramente quel che vien,
     Sto mondo xè de mati un'ospeal,
     Chi vede scuro scuro, e chi seren,
     E chì blatera più xè aponto chi
     Perde contando i travi tuto el dì.
Xè un'ora, e forsi più che al mio taolin
     Stago aspetando co la pena in man
     Che ti me meti in scena un contadin
     Unico fio de Marta e de Bastian
     Che a Sborio conza pote, e berechin
     Tanto de somegiarghe xè lontan
     Che a consultar el medico l'è andà
     El primo dì che el cazzo gà tirà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/27&oldid=58423"