Fora de là casca Tognon in tera
Un tiro de fusil distante apena
Da la casa dei soi: ne l'alta guera
Che ghe fa in braghe la so maschia antena
(Imagineve amici che cagnera!)
Ogni intopo la rompe e grossa e piena
Sbregando el patelon senza modestia
Minaciosa la fuma e la va in bestia.
De Tognon la solene stramazzada
Vede Marta e Bastian, e più del pare,
Come nasse in natura, desperada
Core per darghe ajuto Dona mare:
Sente Bastian de Marta una zigada,
E chiamando in socorso un so compare
Dal telegrafo in aria i vede in tre
Che più assae del bisogno in vita el xè
A sto passo no vogio andar in longo
Descrivendove Marta che ghe sconde
Co la traversa al so Tognon el fongo,
E Tognon rinvenuo che se confonde,
Ma per vegnir al bon tiro de longo,
E usando sempre de parole tonde
Un riflesso farò da visdecazzo,
Cioè che l'acqua no val co tira el cazzo.
E tanto no la val che sguazza ancuo
Sguazza domani, capindo el mio marmota
Cho no xè operativo sto gran fruo
Tre zorni dopo ghe vien sù la fota,
E col so cazzo in aria a spron batuo
Da novo a casa de Caroba el trota,
Ma invece de Caroba domanda chi è
Violante, e chi la sia zà savè.
