Siè cantè sora la villa/Per l'anno 1749
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1748 | Edission e fonte ▼ | Per l'anno 1750 → |
Montebaldesi Strolichi ve invido
Chimici tutti quanti soppiaori,
El dì dei Gnocchi fora ve desfido;
Filosofi moderni, che i Dottori
Fè tanto, e nè mostrando el mondonovo.
Ancò mettìlo in piazza dei Signori;
Zà che desì, che tutto ven dall’Ovo,
Forsi vorrì, ch’an la Gnoccala essenza
Vegna dall’Ovo; e mi contra, e ve provo.
L'è vera che in Verona gnente senza
Ovi se fà, per questo tutto e bon
Gusto Ovidian, e matteria la scienza;
Ma l’Ovo no è prencipio, gne casion
Del Gnocco; ma accidento che megioro
El fà, e pì stagno, e l’è comun punion.
Vù Chimico primario soppiaoro,
Salvè a cozer i Gnocchi el vostro fogo,
Che consumè per nar cercando l’oro;
Desìme intanto in quala crasse, e logo
Volì mettro dei Gnocchi la sostanza,
E in pè de far el Chimico, fè ’l Cogo,
Questi per esser solida piattanza
Metterli in primo logo podaressi
In tel lambico della vostra panza;
Ma crezo zà che no ve storzaressi
Quando la segradona se desmessia
E che con quattro mane soppiaressi,
Per far che i bogia, e che i se cosa in pressa,
E so che guardaressi ben an vù
Che no i ghe rompa el bogio, e che i ghe messia
Strolichi finalmente fora, e a nu
Co i vostri cannochiai, compassi, e conti,
No l’è pì tempo de guardar in sù,
No voi che andemo a specular sù i monti
Gne stelle, gne pianeti, gne felomeni,
Ma Gnocchi informagiè ben, e ben onti;
E se volì parlar da galantomeni,
Desì in vostra consenzia, se ghe sia
Meggior piattanza ai Ricchi, e Poeromeni
Chigo boson sfodrar la strologìa
E tutto esaminar de sta piattanza,
Aspetto, infrussi, segni, e semetria:
Con qual pianeto vada in consonanza,
Se sia prima, o segonda dominanta,
Se in grado, o proporzion sia d’ogni panza.
Ma vezo che ‘l sior Strolico s’incanta,
E che a sto passo se retira in drè;
Onde dirò mi solo per quaranta;
Che gne Stella, o Pianeta el Gnocco l’è,
Ma infrusso d’un Pianeto principalo
Che d’un Mazoro è dominanto in pè.
Questo per genìo squasu naturalo
Sempro è in segno de lira giusta, e pura,
E del Lion in ascendento ugualo,
Da tutti farse ben voler percura
Con quella che un bel Gemino compisce,
E la speranza de cà soa maura.
El revo con la pezza scompartisce,
E alla scarsezza lù con la bondanza
De bon pan, de bon vin ancò suprisce,
E cognoscendo che n’altra sostanza
È necessaria, e questa è la farina
Per far de Gnocchi nobila piattanza,
Fà despensar de questa sta mattina
Na quantità ben granda a na Contrà,
Ch’al so benigno aspetto se avvisina,
E pò formaggio, e bon botter lù dà
A tanti e tanti, azzò che i sia perfetti
Così un composto Trigono lù fà:
De gode in tanto i Ricchi, i Poeretti,
Como che gode el Sol agn’un al paro
Piccoli, e grandi, e infina i Puttelletti.
Gne el Cardano, l'Alì, l'Albumazaro
Strolighi antighi hà mai previsto tanto
Gne scoverto un pianeto così chiaro.
Giovo se vada pur a scondre intanto,
E Venere, e Saturno con Mercurio
Che negun de costoro ha bù sto vanto,
De portar sempro a tutti bon augurio
Como questa de Cesaro novella
Stella, ch’ho cattà mi dal me tugurio.
St’anno sarà la dominanta Stella,
In perfetto quadrato, e sesto agn’ora
Tegnerà tutto sempro lustra e bella,
Darà moto e sistema a chi laora,
De Lira in segno ten i Formaggieri
E l’Aquario per i Osti laga fora,
Se delle Cause i Sagitari veri
In Cancro per le longhe i le sostenta
Lù verzerà alle curte altri senteri.
I Pistori farà che i se contenta
De far bon pan, e spesso el spererà
El tamiso a chi vende la Polenta,
Che sì; che agnun giudizio chiaparà
De sto Pianeto sotto el bel aspetto.
E grammo chi contrario se ‘l farà.
Strolichi che desìo? ma ghe scometto
Che a sto discorso no averzì la bocca;
E andè studiè, che intanto chì ve spetto.
Nè strolicando pur don no ve tocca,
A indovinar dei Prencipi i secreti
E cargar alle cabale la rocca,
E mesurando el moto dei Pianeti
Ingurar sutte, venti, acque, e tempeste,
Fallisioni, e desgrazie ai Poereti,
E a far deventar matte tante teste
Su i vostri versi per cattar un terno,
E far pì d’uno dezunar le Feste;
Altro che dir sarà freddo l’Inverno,
Se vederà la neve anca d’Avril,
E boson star l’Istà col bon governo;
Altro che dir che Venere in sestil
Col Toro la se mette in brutto aspetto,
Quando no ghè pì Stramme su ‘l fenil.
Cabale, indovinelle ve prometto
Tutte quante inventè fora da quei
Che vol far i Alchemisti del Panetto.
Però mi ve dirò, cari Fradei,
E Strolichi, e Filosofi, e Soppianti
Chimici che studiè cosse de mei.
E como fazzo mi, fè tutti quanti,
Mi no vado a cercar dai coppi in sù,
E no me cavo mai col Ciel i guanti.
Basta tegnerse a mente quel che fù,
Che quel c’hà da vegner un solo el sà,
E no vol che savemo quanto Lù;
Descorrì sora quel che ancò se fà,
Desì se v’habba piasso sto bogon
Se sia sta allegra tutta la Città,
Studiè de far quarche composizion,
E guadagnarve como fazzo mi
Da contentar e onzerve el magon:
Far guadagnar el stampador così
E godro de sentir quanti cocconi
Ven fatti a lezer questa de sto dì.
Ho ditto o ben o mal schiao me Patroni.