Siè cantè sora la villa/Per l'anno 1748
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1736 | Edission e fonte ▼ | Per l'anno 1749 → |
LA sarea nobila,
Se me des l'animo
Na cossa ignobila
Tanto Lustar,
Che deventassela
Cossa Lustrissima,
E ognun laudassela,
Sarea gran far:
Ma per cattarghela,
Boson l'origina
De posta farghela
Donve la ven;
Chigo me spirito
Perchè difficila;
Ma g'ho del spirito,
Che spero in ben.
Vù me dè st'animo
Celenzia MOMOLO,
Rettor Magnanimo
Pì de negun,
Perchè mettendoghe
El vostro nobilo
Lomo, cedendoghe,
Tasarà agnun.
E se un sproposito
Paresse a dirvela,
For de proposito
No la sarà;
Tante ancò i semena
Rezarie i Homeni,
Ch'anca ogni femena.
De inventa e sà.
La Bigolaida
Hà bù el so merito,
La me Gnoccaida
No l'havarà!
Vegna quattordese
Moderni criteghi
Con le so forbese
Che mi son quà.
E se tassarmela
Per cossa stolida,
E gnan passarmela
No vol negun;
Mi sarò un stolido,
Ma el principaliter
Dell'aria insolido
Ne mette a un.
Dei Gnocchi amabili
Donca discorrerve
Panze insaziabili,
Me scoltarì,
Ma no stè a crederve
Che testi, e codici
Vogia far vederve
Sora sto dì.
Dalla Dea Venere
Hà i Gnocchi origine,
Quan Troja in cenere
Era per nar;
Che per far rendere
Giovo, e quel fulmine
Farghe suspendere,
Ghe i fè magnar.
Savì per regola,
Che per cattarghelą
Agni pettegola
Sà d'invenzion;
Però lo suprica
Con pianti, e lagreme,
Lo prega, e reprica
In zenocchion.
E tanto pregalo,
Che otten la grazia,
E narghe piegalo
Un dì a disnar:
(Solita trappola
De donna Venere,
E chi la scappola
Se pol segnar.
Al Vecchio un Veneri
Costìa na piadena
De Gnocchi teneri
La ghe innasiè;
E lu magnandoli.
Oh Gnocchi amabili!
Disse, laudandoli
Ella parlè:
Giovo Lustrissimo,
Ve prego e suprico,
Dedo carissimo;
Como savì
Sta Città povera
De Troja e misera.
La se ricovera
Sotto de mi.
Ma i Greghi, o misera!
I la perseguita;
La se commisera
Con mi, che son
La so Dea amabila,
E per defenderla
Pì no son abila!
Feme rason.
Però piasevolo
Nume, ve reprico,
Sieme amorevolo,
Deme sto onor,
Se tanta smania
Ho per sto populo,
Sarìa na strania
Dura de cor.
Giovo ve venero,
Sì le me viscere,
Per quel pì tenero
Amor che v'hò,
Da sta desgrazia
Salvè i me Trojadi;
Basta sta grazia
La spettarò.
A sta zirandola
Giove fermandose;
E pò mirandola
A potifar;
Tutto sentendose
De' Gnocchi andarsene
In brò, movendose
Se fà a parlar.
O Dea belissima
O Donna amabila,
Deda carissima,
Ve son fedel;
Sta grazia sarvela
Posso e delibero,
Perchè a negarvela
Sarea crudel.
Diga agn'istoria
Giovo morevolo;
No gh'é memoria,
Mai scurzo fu;
Mi ve ringrazio
Dei squisitissimi
Gnocchi son sazio,
Sarò con vù.
Chigo un Littrario
Dise, che Venere
Per ordenario
I Gnocchi dà,
Gnocchi dolcissimi
Al gusto, al stomego
Gnocchi amarissimi,
Che star mal fà.
Chi podes crederla
La cossa è nobila
Ma boson cederla
A chi la vol,
Che da sta favola
Certo me dubito
Che Gnocchi in tavola
Sperar no pol.
Che se pò a dirvela
La volì in prattica
E como scrivela
Ventura, l'è
Immemorabila
Usanzia e nobila
De i Gnocchi e stabila
De i Sanzenè.
Che agn'anno a farsegi
La grazia prubica
Ghe dà, e conzarsegi
Ben e no mal;
O duri o teneri,
O grossi o piccoli
L'ultimo Veneri
De Carneval.
Vù Cellentissimo
Rettoro MOMOLO,
Generosissimo
In sta casion
Havì da l'ordene
Che abbondantissimo
Senza desordene
Sia ancò el bogon;
E che in sustanzia
Trionfo insolito
Sia de bondanzia
Sto primo dì;
Così el magnanimo
Su sto prencipio
Vostro bell'animo
Mostrar volì.
Verona, guardelo,
Un Sol no parelo!
E no tramandelo
Propio spiandor!
Vè che bellissima
Maestà e presenzia!
Che nobilissima
Aria, e che cor!
No te innamorelo
Proprio, mirandolo,
Verona, onorelo
Pì che te pò:
Su via descantete
Và riveriscelo,
E raccomandete
All'amor sò.
Te po prometterte
Che 'l vorrà subito
In sesto mettere
Quanto el porà,
E governandote,
Agni desordene
E via levandote,
Pare el sarà.
Pare del povero,
Pupilli, e vedove.
Brazzo, e ricovero
Lu ve darà,
E strussi, e cabale,
Costioni, e strepiti,
E schioppi e sabale
Lù sbandirà.
Como la nobila
Aurora e Sprendida
So stella mobila
Ne porta el Sol;
Così l'amabila
Sposa dignissima
Dama adorabila
Ghe faga un Fiol.
Che sia delizia
Del so bell'animo
Che sia letizia
De sta Cittá;
Sto bon augurio
Ventura povero
Dal so tugurio
Ghe prega e fà.