Se sia più pregevole la memoria o la fantasia (1845)
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
SE SIA PIÙ PREGEVOLE LA MEMORIA
Patres conscripti... volea dir, compagni,
So qua anca mi per dirve su la mia
3Senza andar a tor volta a tanti piagni.
Sta question donca se vol definia:
Quaeritur an... lassemo da una banda...
6Se vagia più memoria o fantasia?
Sentì... Mercurio zo d'Olimpo manda
Un certo enciclopedico giornal,
9Un zechineto a l'ano a chi 'l comanda.
In st'opera pienissima de sal
Una cossa a proposito go leto,
12Cavada da un articolo moral.
Scrive un autor (che 'l nome no ghe meto)
Che fra la dea Minerva e 'l biondo Apolo
15Un dì gh'è stà un contrasto maledeto.
I se n'à dito a rotazza de colo
Per sta istessa istessissima question;
18Che deboto i volea tirarse el colo!
I avea principià a dir la so opinion;
Da l'opinion i xe passai ai strapazzi,
21Come fa i frati ne le conclusion.
Apolo, che xe el re dei omenazzi,
Porta la fantasia; e la memoria
24Minerva la sostien coi pie, coi brazzi;
Ma Giove dise: «cossa xe sta istoria?
Quieteve che doman nel tribunal
27Vogio decider mi de la vitoria.»
Alora co un eviva universal
Tuti ga fato aplauso a sto bel deto,
30Fina Marte quel dio tanto bestial!
Come in stecato al salto del toreto
Se aspeta la sentenza tra do can,
33Che ai paroni ghe bate el cuor in peto,
Cussì a sti dei; ma sin che vien doman
Tuti do se prepara a la difesa
36Con Bartolo, con Baldo e Giustinian.
Dei numi tuto el resto in sta contesa
Chi tien da questo e chi da quel partio,
39Secondo che la cossa vien intesa.
Venere a spada trata porta el dio,
Che l'è omo, l'è belo, l'è poeta;
42E po per far dispeto a so mario.
Marte, che no ghen da una maledeta,
El pare de le muse el porta anch'elo
45Per do parole de la moroseta.
Diana a rason sostenta so fradelo;
Cerere e Teti porta el dio del zorno,
48Insieme con Cupido el bon putelo.
Saturno co la gota e 'l capo storno,
Pluton, che no sa gnanca l'A B C
51I dise: a mi no me n'importa un corno.
Mercurio de le birbe par el re,
El fa 'l belin a tuti, e 'l li minchiona,
54Che solo per chi vince lu ghe xe.
Ma Giunon, la superba b.....a,
Se ben la se ricorda de quel pomo,
57Pur a Minerva protezion la dona.
Baco, el zoto Vulcan, Netuno e Momo
Da la nemiga i tien del matrimonio;
60Saveu perchè? perchè no la xe un omo.
Ma sentì se quel zoto xe un demonio:
El ga tirà la diva in t'un canton
63Per ricordarghe el fato d'Eritonio.
L'Aurora intanto vien verso el balcon
E la se mete su una cotoleta,
66Lassando in leto so mario Titon;
Quando sior Ganimede in freta in freta
Le porte averze del real palazzo
69Ai litiganti che xe là che aspeta.
Minerva vien co i so sapienti a mazzo,
Vergine onesta, alquanto muso duro,
72Co l'asta in man e col so scudo al brazzo.
Platon in fra i filosofi figuro,
Pitagora l'amigo de le fave,
75Che cazza via l'incredulo Epicuro;
Aristotele vien pensoso e grave,
Socrate va spuando la cicuta,
78E una mugier più docile vorave.
La razza filosofica gh'è tuta,
Ma vedo in quela certe teste mate,
81Che no sta gnente ben co quela puta.
Vien po fra le persone leterate
Quel Ciceron che i ga tagià la testa,
84Quel Plinio che ga perso le zavate.
Quel, ih ih!... ma tanti a nominarghe resta
Che no se conta tante stele in cielo,
87Nè l'istà tanti grani de tempesta!
Intanto xe qua Apolo, e vien con elo
I poeti e le muse, e una genia,
90Che a Omero faria perder el cervelo;
E giusto l'orbo Omero eco vien via,
Pindaro a dreta, a zanca Anacreonte,
93E Lin e Orfeo che i ghe fa compagnia.
Vegnia el cavalo de Belerofonte,
Ma perchè el gera zoto un pie davanti
96L'è restà a far la guardia al sacro monte.
Virgilio fra i latini vien davanti,
E Orazio favorito de un monarca,
99E Ovidio doto maestro de amanti;
E quel toscan che con Virgilio in barca
Le bolge de l'inferno el sta zirando,
102E monsignor canonico Petrarca.
El gran cigno del Po cantor d'Orlando
Xe arente al malinconico Torquato,
105Che forse el mondo no ga bu el più grando.
Largo, largo. Eco Alcide, eco qua el mato,
Che precede el vegnir del gran tonante:
108Che largo in un mumento che i ga fato!
Come quando che 'l sol sponta in levante,
Portando a l'universo el so splendor,
111Le stele ghe dà logo tute quante;
Cussì anca a Giove; no gh'è dio minor,
Che no ghe fazza riverenze e inchini,
114E no pieghi el zenochio a farghe onor;
E lu con modi afabili e divini
Va a sentarse sul trono; e tuti lori
117Se ghe senta per ordine vicini.
Po voltà ai litiganti, el dise: «siori,
Son qua per pronunziar la mia sentenza,
120Via vegnì qua, za so che sè dotori.»
Apolo, che xe pien de convenienza,
Fa noto a Pala che la se presenti.
123Ela principia co una riverenza:
«Padre e signor de le increate menti
Se mai...» ma Giove ghe risponde: «mata,
126Animo presto e senza complimenti.»
«Donca», la dise, «padre qua se trata
Che decidè per vostra e per mia gloria
129D'una question che la me par spacata.
Tolè pur per le man tuta l'istoria,
E vedarè che no gh'è arte o scienza
132Che no abia relazion co la memoria.
Se a l'anima mancasse sta potenza,
Cossa ghe giova el so discernimento?
135Caveghene po vu la conseguenza.
Ergo xe chiaro in forza d'argomento,
Che solo in sta fedel depositaria
138L'inteleto ga tuto el fondamento.
La memoria xe tanto necessaria
Al nume, a l'omo, e fin al bruto istesso
141Quanto l'acqua, la tera, el fogo e l'aria.
Mi no ve vogio andar secando adesso
Col farvene a puntin la notomia
144Per no abusar del termine permesso;
Infin po cossa xe sta fantasia?
Sta fantasia, che ancuo co mi contrasta,
147Xe sorela carnal de la pazzia.
A ela nei so svoli tanto vasta,
A ela no ghe xe gnente de scuro,
150E i limiti prescriti no ghe basta.
El presente e 'l passà missia al futuro,
E tanto la confonde l'inteleto
153Che a volte a giudicar no l'è sicuro;
Donca le mie rason in vu rimeto;
So che son fia del vostro gran cervelo,
156Padre e signor, la gran sentenza aspeto.»
Ma Apolo salta su: «siora, bel belo,
El dise, no stè a farme el bruto muso;
159Forsi credeu d'aver catà un putelo?
Forsi credeu che sia restà confuso?
O penseu forsi de cazzarme in saco?
162Comare, a ste marende ghe son uso,
E sul vostro parlar giusto me taco,»
Qua el fa un inchin ai numi e al somo Giove;
165E po el scomenza a dir: «sangue de baco,
Domando mi, quando un ogeto move
Un qualche senso esterno a contemplarlo,
168Lo porta el senso in fantasia, o pur dove?
Toca a la fantasia l'imaginarlo,
Ela xe che 'l depenze a l'inteleto,
171E toca a la memoria el conservarlo.
Donca me sembra de mostrarve schieto,
Che se mancasse mai la fantasia,
174Sta vostra gran memoria va in broeto.
E cossa serve che me vegnì via
Col dir che no gh'è scienza o arte al mondo,
177Che parto de memoria no la sia?
E mi, comare cara, ve rispondo,
Ch'anzi la fantasia xe giusto quela;
180E vel mostro co un fato neto e tondo.
Disè, per carità, cara sorela,
In t'un quadro de Paolo o de Tizian
183Ga el merito el pitor o pur la tela?
No basta; ma anca st'altra vien drio man:
Quando sentì un concerto de violin
186Ga merito la corda o pur la man?
Che se col dirme, no la ga confin,
Avè preteso de vituperarla,
189Rispondo, che 'l xe un pregio anzi divin.
Vu la memoria sè intrigà a provarla
A l'omo necessaria, al nume, al bruto,
192Perchè el senso comun contrario parla.
Se ai numi eterni gh'è presente tuto,
Se per lori no gh'è tempo passà,
195Donca dove fondeu sto vostro agiuto?
Se el bruto da l'istinto xe guidà,
Dove fondeu sto vostro benefizio?
198Dove fondeu sta gran necessità?
Se l'omo xe un composto d'ogni vizio,
Se la memoria serve de ricordo,
201Lu ve ne indorme de sto bel servizio.
Su questo basta; adesso volto bordo,
E fin col vostro dir ve voi provare
204Che vu istessa co mi za andè d'acordo.
El somo Giove no elo vostro pare?
La fantasia xe la so essenza prima,
207Donca la fantasia xe vostra mare;
Ma cossa serve che 'l cervel me lima
A provar una rason tanto evidente,
210Che a contrastarla vu perdè la stima?»
Minerva, che becada la se sente,
E che la gera un tantineto stufa,
213Una brespa no ga da che far gnente!
La strenze i denti, la biastema e sbufa;
Ma Giove che a la larga el se n'à incorto,
216El dise: «Oe, seu vegnui per far barufa?
Fia, el so, le done mai vol aver torto;
E ti, che per parlar ti è un capo d'opera,
219Ti vol rason o per dreto o per storto.
Apolo, che ti è un omo in verbo ed opera,
Fa a mio modo, sta volta daghe el vanto;
222Che se sol dir: chi à più giudizio el dopera.»
Tuti se quieta, e comparisce intanto
Ganimede con goti e gotesini
225De ambrosia, che la gera mo un incanto!
Le dee con quei so amabili bochini
Andava sorsegiandola a bel belo,
228E le sfiocava prindesi divini.
Baco ghe n'à bevù più d'un mastelo,
E fin Minerva, che del vin xe astemia,
231Col goto che ga sporto el dio de Delo
Un prindese l'à fato a st'academia.