Se Subiecit
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Buffalo Bill | Edission e fonte ▼ | F. I. A. T. → |
Et j'ai trahi la Tremoville et l'amour
Pour assister à trois messes par jour.
Voltaire, La Pucelle, XVI.
COME? ― l'Eminentissimo ga dito ―
Come, tartaifel? Mi voler saver
Per cossa mai sto Santo col braghier
No ti lo gà gnancora profibbito? ―
Mi gò risposto subito e pulito
Ne l'istesso lenguazo forastier:
― Mi nix cognossar Santo Fugazzer,
Che averne basta de Sant'Espedito ―
― Co el gà sentìo st'oracolo formal,
El gà fato la so genuflession
E mi gò dito ― Schiavo Cardenal! ―
Dopo, el libro xe andà in Congregazion
E gò imparà stasera dal giornal
Che i gà petà la mia proibizion.
Mi no gò fato caso, ma l'autor
Che xe molto devoto e bon cristian,
Xe corso in chiesa con le braghe in man,
A domandar pietà dal confessor,
E, sotomeso al Padre Inquisitor,
(Stele, che fufa!) el gà voltà gaban,
Renegando davanti al so piovan
El pensier, l'arte, le parole, el cor.
E no credessi mai ch'el sia un zucon
De quei che scambia i fati con le fole,
Anzi el xe Consultor de l'Istruzion.
Et reprobavit! Queste xe parole!
Che caratere, ciò, che convinzion!
Che bel esempio per le nostre scole!