F. I. A. T.
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Se Subiecit | Edission e fonte ▼ | Plaustrum sacrum → |
.jpg)
Et ecce venio velociter.
Apoc. XXII, 7.
MI son omo tranquillo e senza buzare,
Ma pur gò una passion,
Che la saria d'andar in automobile
Fora de sto porton;
Piantar gendarmi, paladini e svìzari
Che i me detiene qua
E divorar chilomatri e chilomatri
A gran velocità;
Còrar contento per la strada libara,
Come ogni bon cristian,
Vedendo scampar via le case i albari,
Le vale i monti, el pian:
Passar tra i campi coronai de pampani
E i prati e i orti in fior,
Sentir quel vento che rinfresca l'anema
Come un baso de cor.
E via ne l'alba che deventa porpora,
Via ne l'oro del sol,
Col seren con la piova, con le nuvole,
Come rondena al vol.
E via traverso le campagne fertili,
Traverso le cità,
Lodando Dio, benedisendo i omini
De bona volontà!
Andaria de quel passo sin a Mantova,
Indove me sovien
Che tuti quanti, quando giera Vescovo,
I me voleva ben;
Perchè pregava sul altar pei povari
Martiri de Belfior,
Impicai da la corda del carnefice
E de l'Imperator;
Po' nel paese dove son sta paroco
Che vangava el zardin,
Po' ne la casa dove in mezo ai albari
Son nato contadin,
E po' a Mestre e de là, con una gondola,
Dopo tanto zirar,
A riveder San Marco, i so mosaici
E finalmente el mar,
El mar serenamente imenso e splendido
Ne la so maestà,
Che parla del Signor a chi sa intendarlo
E de la eternità.
El mar, Venezia... Oh Dio, che l'automobile
Giera sogno... ilusion...
Povaro Bepi! Sento abbasso i svizari
Che i te inciàva el porton!!