II.
Mi no gò fato caso, ma l'autor
Che xe molto devoto e bon cristian,
Xe corso in chiesa con le braghe in man,
A domandar pietà dal confessor,
E, sotomeso al Padre Inquisitor,
(Stele, che fufa!) el gà voltà gaban,
Renegando davanti al so piovan
El pensier, l'arte, le parole, el cor.
E no credessi mai ch'el sia un zucon
De quei che scambia i fati con le fole,
Anzi el xe Consultor de l'Istruzion.
Et reprobavit! Queste xe parole!
Che caratere, ciò, che convinzion!
Che bel esempio per le nostre scole!
