Romanzi novi
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Do vilegiature | Edission e fonte ▼ | Dopo la festa → |
.jpg)
Omne autem quod non est ex fide, peccatum est.
Ep. S. Paul. ad Rom., XIV, 23.
GALI gnanca fenio sti giornalisti
De ciacolàr sul Papa
Che debòto tra lori e i modernisti
La pazienza me scapa?
Pazienza? Caro lu, ghe ne gò molta,
Ma i xe pur secatori!
I totani sta in mar, ma qualca volta
I se seca anca lori!
Che se i me trata come un parpagnàco
Quanto xe vero Dio
I vederà che fulmini ghe sgnàco
Nel so bravo dedrio!
E za che i so romanzi i xe un'ofesa
Al Papa e a la Scritura,
I vedarà cossa sa far la Chiesa
Anca in leteratura!
Gh'è dei zoveni qua de primo pelo
Che i scrive libri eterni.
Galo visto el volume de Campelo,
«I Pòcriti Moderni?»
E ghe n'è un altro: un zovenòto fresco,
Matè... Matò... Matisse...
Basta: Lassèmo andar. Zà el xe un todesco
«E alor, chi lo capisse?»
Dopo de lori vien... vorlo savèr?
Nol xe zovene tanto...
L'indovina? Vien Toni Fugazzèr...
Bravo! Quelo del Santo!
Via, no la storza el muso! El xe pentio...
El domanda perdon;
El scrivarà un romanzo a modo mio
E de la Inquisizion.
L'è vegnuo per basarme la pianèla
Molesin com'el pan,
E alora mi gò sugerio la tela
De un romanzo cristian.
Ecola qua. Pierin gaveva un pomo
E el gà dito al Signor:
«Se col Papa farò metà per omo,
magnarò più de cuor».
El Fugazzèr gà dito: « Altro ch'el Santo!
Questo xe l'ideal!
Resto un cordon! Me ne ralegro tanto
Con lu e Meri del Val!»
Mi lo gò benedeto in so bonora,
Aeternam rei memoriam!
E adesso el Senator scrive e laora
Ad aeternam Dei gloriam!