Dopo la festa
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Romanzi novi | Edission e fonte ▼ | Casca le fogie → |
.jpg)
Possunt quia posse videntur.
Virg. ÆN., V., 231.
GALO sentio el sbaro del canon,
El solito discorso a Porta Pia,
El solito despazzo del Paron
E le solite sborgne a l'ostaria?
Galo visto passar la procession
Organizzà da la Masonaria,
E galo visto l'iluminazion?...
Che bela festa, ciò! Alagria, alagria!
I pizardoni i gà marcià in montura,
I vigili s'ha messo l'elmo in testa
E le... putele ha spassizà in vettura.
I gà fato el Comizio de protesta,
I gà parlà de mi in caricatura...
Che bela festa, oh Dio! Che bela festa!
Geri sera, sentà su l'altanèla,
Me godeva, in zavàte, un fià de vento
E vardava spontar la prima stela
Da una strissa de nuvole d'arzento,
E cussì, al fresco de la bavesèla,
Gò dà la mola a sto rasonamento,
Che gò dito: ― Va ben; ma come xela
Che l'omo al mondo no xe mai contento?
Vardè! Qua i gà San Piero, l’Araceli
L'Eden, i sette coli, el Quirinal,
La tripa, i gnochi, el vin de li Casteli;
I gà el Travaso, i gà la Capital...
E ben, no vorli adesso, sti porcèli,
Che ghe lassa fischiar Meri del Val?
Porcèli? Andèmo, per amor de Dio,
Che xe megio dir aseni e ignoranti
Se, in tanto tempo, no i gà ancor capio
Che ghe la fazzo in barba a tuti quanti!
No i vede? I me domanda, el parer mio
Prefeti, tribunali e governanti
E i lo eseguisse sempre e i me vien drio
Servitori umilissimi e zelanti;
E mi, fina ch'el vento vien cussì
In pope de la Barca Veneranda,
Rido sul muso a no me importa chi.
Povareti! I va a spasso a son de banda
E no i capisse ch'el Paron son mi
Che governa, che regna e che comanda!