Risposta al Lamento delle Veneziane
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| ← Lamento delle Veneziane | Edission e fonte ▼ |
Done, no ve dè pena:
No ve metè in spavento
Se fusse anca per vu zonto el momento
De meterve in caena,
5O, a megio dir, de meter la cavezza
A tanta tracotanza e sfrenatezza.
No ve ramarichè,
El mal no sarà grande
Come che vel pensè.
10Se sa che dei Catoni,
Dei Fabi, dei Licurghi e dei Soloni
Xe passà el tempo, e che 'l mondo moderno
Se ride de quei mati e se fa scherno.
Ancuo se vol che ben vestii se vaga,
15Sempre serae no se ve vol in casa,
Molto manco in cusina
A cuser canevazze,
A taconar vestidi e gabanoni;
Un pensar sarìa questo da minchioni.
20El mondo tuto ve vorà carète,
No convertie, desmesse e anacorete,
Come senza razon andè esclamando;
No abiè timor de questo,
A idee sì strambe dè un perpetuo bando,
25Quel che da nu se vol xe ben tut'altro?
Metève in atenzion, e ve protesto
De dirve el con e 'l ron tuto desteso
Aciò no possiè dir che no avè inteso.
Da vu altre se brama, che dai fianchi
30Ve sia stacà i Serventi,
Perchè semo po'stanchi
De veder la Cità piena a martelo
De marii cornisai, b... contenti;
Se vol troncà el bordelo
35Dei vostri Rendez-Vous,
Nè che i se fassa più.
Xe savio el mondo e nol vol più sofrir
Che una galanteria sia el vituperio,
E un vezzo de la moda l'adulterio,
40Cossa ve par, carine?
Cosa me saveu dir?
Qua lucheti no gh'è, no gh'è tirani,
Nè se vol che stè in casa retirae
E sempre condanae
45A laorar e a mastegar corone,
Basta che più no fe le b...e.
Che i patrimonj no buté in sconquasso
Coi bertoni, col ziogo e in darve spasso,
Che de più no iritè la Tera e 'l Cielo
50Perchè abiemo a provar qualche flagelo.