Quatro done in una casa
|
Edission original: |
Trieste vernacola, Antologia della poesia dialettale triestina, a cura de Giulio Piazza, Milano, Casa Editrice Risorgimento R. Caddeo & C., 1920 |
|
Fonte: |
| Edission e fonte ▼ |
La dormi fin le diese de matina,
Po la se fa toilette con aria stanca,
Avanti déjuner la ciol la china
Per svejar l'apetito che ghe manca.
Ogni giorno la fa la trotadina
Nel suo coupé cola cavala bianca;
La par una pupeta parigina
Co l'abito tailleur che la disfianca.
De sera in palco, in lusso come a Corte,
La ga un diadema sui cavei rizzadi;1
Ma sempre in zerca de una scossa forte
Per quei poveri nervi rilassadi;
Ghe infastidissi quel marì borghese
Che no xe bon che de pagar le spese.
La xe un toco de dona2 ben formada,
Bionda, de un biondo poco natural;
La ga un cagneto in casa e un papagal,
E del marì la vivi separada.
La xe sempre de mus'cio profumada,
La va ai velioni spesso in carneval;
Ma co xe giorno, la se ciol per mal3
Se un giovine la ferma per la strada.
Ghe piasi assai la musica e i fioreti,
Per i fioi pici4 la ga un vero amor,
La ghe dà 'l soldo a tuti i povareti;
Ogni disgrazia ghe fa gran dolor:
Ma la gente fa zerti soriseti
Ciamandola una dona de bon cor.
Alta e sutila ma con bele spale,
Con un museto schizzo5 birichin,
La studia nela «sesta liceale»
E ghe fa assai la corte un studentin.
La va al tennis, ai bali, al Comunale,6
A un corso de pitura e de violin;
Ma per tuta la strada, fin le scale,
Ghe cori sempre drio quel moscardin.7
La legi assai — romanzi specialmente —
E ale scene de amor la se figura
D'esser ela abraciada col studente.
Cussì le classi8 a scola xe un oror!
Ma le «seconde» no ghe fa paura:
Ghe basta esser la «prima» nel suo cor!
La riva a tuto:9 a tender la cusina,
Far la spesa, le camere, lavar,
Straponzer i abitini, sopressar,10
E vestir quattro fioi ogni matina.
Bionda, grassota, rossa e picinina,
La se dòndola11 assai nel caminar;
E co la va un momento zo a comprar,
La se meti una vecia mantelina.
Ma co xe festa, i fa la baracada;12
Davanti, i fioi coi stivaieti bianchi,
Ela col capelin, ben inguantada,
A brazzo del marì la scassa i fianchi,13
La se diverti un mondo in ogni gita,
E la ridi, contenta dela vita.
- Note
- ↑ rizzadi, arricciati.
- ↑ un toco de dona, un bel pezzo di donna, una donna robusta
- ↑ la se ciol per mal, si offende, se n'ha a male
- ↑ pici, piccoli; fioi pici, bimbetti.
- ↑ museto schizzo, musino camuso
- ↑ al Comunale, cioè al teatro Comunale, il teatro Verdi di Trieste
- ↑ moscardin, bellimbusto, vagheggino
- ↑ classi, classificazioni.
- ↑ la riva a tuto, arriva a far tutto, cioè fa a tempo a far tutto
- ↑ straponzer i abitini, rammendare i vestitini; sopressar, stirare
- ↑ la se dòndola, si dimena (voce più veneziana che triestina)
- ↑ la baracada, la gozzoviglia
- ↑ la scassa i fianchi, agita, scuote, in questo senso, dimena i fianchi.