Progetto contro Apollo
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Autunno cittadin, e campestre | Edission e fonte ▼ | Alla Brunetta Anassilide → |
Za che avversario mio tanto ti è fatto
O botteghier da versi Apollo matto,
Za che ti ga el progeto
De mandarme dei mali, o storto, o dreto
Voi ribellarme, e vogio aver vendeta,
Non più sudito too, non più poeta.
Vogio farte fallir, te voi redur
Pitoco a segno da dover condur
Vita la più stentada,
Come un milion dei toi la ga passada;
E perchè apponto ti te xe immortal
Eterno vogio fabbricarte el mal.
Quella chitara un dì tanto sonora,
Che milioni de versi ha butà fora,
Ridota una ribega
Starà sepolta nella to bottega,
E del Parnaso quelle nove scioche
Le andarà a pasto tutto dì coll'oche.
Propono al mondo, al mondo incivilìo
Che sa tegnirghe a sti progeti drio,
Che un dazio sia fissà
Su tutto quel che vogia esser stampà,
Ma gravosa propono una gabella
Da maltrattar qualunque sia scarsella.
Un sonettin per nozze, un madrigal,
Che vol la moda che sia scritti mal,
Per aver la licenza
De comparir del mondo alla presenza,
Ognuno pagarà senza contrati,
Piasa, o despiasa sedese ducati.
I versi sciolti che vol dir brodosi
Fatalissimamente numerosi,
Vinti soldi daziadi
I sia per uno se i li vol stampadi,
Ma a pato espresso che passando i cento
D'un altro traro all'un ghe sia l'aumento.
Quelle composizion che tutto, el zorno
Per nove Messe andar se vede atorno,
Quelle per dotorai;
E per chi da un malan se xe salvai,
Per esponerli un'ora, a drio sti pati,
Ognuno pagarà trenta ducati.
Auguri d'anno novo, e complimenti
Per vinte cause, o fatti avanzamenti,
Quei tanti epigrametti,
Che delle belle esalta anca i difetti,
Sessanta lire all'un dovarà dar
Quel capricioso che li vol stampar.
L'eroidi, l'elegie, le canzonette,
E tante de ste misere robette,
Che adula un Epulon,
O manifesta frivole passion,
Tre lire al verso le sarà pagade
Per poder sparagnar cussì seccade.
Comiche produzion spettacolose
Co frasi proclamae tanto ampolose,
Romanzi d'ogni sorte
Dove campiza amor, delirj, e morte,
Co i sia de trenta pagine formai,
Cento ducati se i se vol stampai.
Rubrica frascarie sia dita a quella
Che abbrazza la sciarada, e la novella,
La favola ghe sia,
E qualunque altro scherzo in poesia,
Ma ai versi de sta sorte el dazio è fato!...
O curto, longo, ognun paghi un ducato.
Quando in pratica sia messo un progeto,
Che tende a procurarne un dopio effeto,
Cossa farastu ti
Bel biondo, che vissù sempre cussi
Ti xe, no avendo che l'entrae meschine
Delle to predilette Eliconine?
Te vedarò pitoco, e vendicà
Sarò mi de quel mal che ti m'ha dà,
E'l mondo stuffo assae
Delle diaree poetiche stampae
Farà plauso alla mia nova vendeta,
Non più sudito too, non più poeta.