Poveri veceti
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Per un gran sepolcro | Edission e fonte ▼ | Siora Nani e siora Maria → |
Do poveri veceti
No i voleva più al mondo tribolar,
E abraciai streti streti
I se xe andai negar.
Iera do onesti, boni
Come el pan, i sgobava
Tuto el giorno e i campava
Se non da signoroni,
Cussì, i se la passava
Ala meio, e ogni aneto
A furia de lavor e economìa,
I fazeva el viageto,
Ma no i bufava via.
Un giorno — bruto giorno, —
Ga scominzià el lavor a scarsegiar;
I veci se ga dà le man atorno
Per poder rimediar;
Ma, o Dio, la sartoria
Iera de stampo antico come lori,
E a poco, a poco, a poco xe andai via
Quasi tuti i lavori.
Garzone e lavorante
Dala matina a sera,
Iera spesso debando,
De sabato la paga tuta intiera
De quando in quando
Mancava, e i do veceti
Impegnava, impegnava
Fin i linzioi dei leti.
Ma tuto inutilmente,
No tornava el lavor,
E licenziar la gente
Poveri, i ga dovesto con dolor.
Iera una bela sera,
Un bel ciaro de luna, un ciel brilante
De milioni de stele;
Cantava primavera
Le sue strofe più bele
De amor el gran mistero
Nel peto de ogni amante,
E in cor dei do veceti
Colpidi da la sorte,
Come diamante nero,
Brilava la salveza nela morte.
De più de un’ora a tavola sentai
No i fazeva parola,
Avilidi cussì no i iera mai,
El pianto ghe fazeva gropo in gola.
Nudava i oci in lagrime, dal cor
I sospiri vigniva suso come
El rantolo de chi sta per morir.
Che strazio, che dolor
Che no ga nome!
Meio, meio finir!
― Meio, meio morir, no xe altro scampo
No la xe vita questa!...
Disi el veceto alfin, e come un lampo
L’istessa idea balena de ela in testa.
Tuti frementi dala comozion
I se alza, i se guarda fisso in viso
E in un slancio de amor e de passion
1 se abracia, i se basa...
Fata una volta la risoluzion
I se vesti, i va fora, i sera casa.
I va, i va, i va, streti a brazeto.
Come do sposi che va far l’amor;
I par contenti, i par, ma dentro in peto
Incalza la tragedia del dolor.
Xe el ciel tuto stelà, la luna viagia, —
Susura el mar che rompi sula spiagia
E par che cento vose
Lontane, misteriose,
Con cupa melodia
Canti dei do veceti l'agonia.
I va, i va, i va! - Ecoli in mar,
L’aqua i piedi ghe bagna..
I se ferma.. El veceto vol basar
L’ ultima volta la cara compagna...
E avanti, avanti, avanti...
Xe una note de amanti.
Dei due veceti el cor palpita forte,
Splendi la luna che ghe bati in viso,
I fa l'amor adesso cola morte..
Dopo i farà l'amor in paradiso.
I va, i va, i va — za fin al peto
Xe l’aqua... fin al colo...
Un baso ancora, povero veceto,
Un baso, un baso solo...
L'aqua se sera su due teste bianche,
Su quele anime stanche
Che no ga avù fortuna...
E tramonta la luna.