Per un baso
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← L'influenza | Edission e fonte ▼ | Amor de Sèleghe → |
Per un baso
Cossa vol dir mia bela moretina
che più no ti rispondi al mio «bonzorno?»
l'ò rimarcà gersera e sta matina
quando che t'ò incontrà in Cale del forno.
Còcola mia, su quela testolina
ghe xe qualcossa che te zira atorno?
Xe forse par quel dì che, a mi viçina
t'ò dà un baseto? E quelo xelo un scorno?
T'ò dà un baseto, si, mi no lo nego:
ma ti, in quel bel momento benedeto,
ti me disevi: un solo xe pocheto.
E adesso ti fa 'l muso? Via, te prego;
co ti me incontri dime: ciao, ben mio,
o, se ti credi, dame el baso indrio.