Oh sti putei!
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← A casa | Edission e fonte ▼ | Quadreto a ogio → |
'Na sera no saveva cossa far
par mincionar el tempo, e stufo gera
de lèsarme i zornali de la sera,
che sorte a la matina, e de fumar
gera za belo e stufo. — A miera a miera
vegniva in mente mia zogatolar
pensieri e idee, ma no savea cucar
quel che m'avesse fato bona çiera.
Che scrivesse? che fasse zo un soneto?
A mia muger che lavorava arente
ghe digo: Vustu darme ti un sogeto?
La mia putela Aminta (oh sti putei!)
la me dise: Se no ti tlovi gnente
sclivi de mi te go i ocioni bei.
Fato che go 'l soneto ghe lo leso
co la fiacheta tuto a mia muger,
e podè imaginarve se de peso
sia stà inalzà a l'onor del mio saver.
Mi gera un Dio, n'arca de scienza in meso
a la mia famegeta, e dal piacer
che co provà sul cuor, longo e desteso
sora 'l sofà.... go tracanà un bicer.
Un'altra mia putela, più grandeta,
da gelosia ponzua parchè 'l soneto
fato gaveva a la so soreleta,
la me fisa co xe da là un pocheto:
E a mi no ti me scrivi? Oh povareta!
Vustu che scriva che.... ti pissi in leto?