Nova Canzonetta
|
Edission original: |
August Kopisch, Agrumi, Berlin, Verlag von Gustav Crantz, 1838 |
|
Fonte: |
| Edission e fonte ▼ |
Chi xe curiosi de saver
El dolor, el despiaser,
Che sopporto notte e di,
Per una mala mugger,
Se retira qua da mi,5
Che brevemente se vu me starè ascoltar
Zoventù, che ve fè amar
Forse ve farò calar
El pensier, el bel umor
Del volerve contentar.10
Sappiè donca, che il morbin
M’ha mandà riduto alfin
La mia cara libertà;
Sicchè son el più meschin,
Che si trova in sta città,15
Per una donna, qual ho tiolta per mugger;
Chè a volerla governar,
Non è bastante el mio poder;
No ghe posso commandar,
L’ha un cervello troppo altier.20
Ela vol boni boccon,
Ela vol bever vin bon,
E no vol mai lavorar,
Nome star sempre ai balcon
Coi vesini a chiacolar,25
Se la reprendo con el dirghe: Cara ti,
A una donna non convien
De star persa tutto el dì:
La mi dise presto e ben,
Che vaga a lavorar mi.30
Se mi compro da magnar,
Ella no vol cosinar;
Per non si sporcar le man.
No la vol piatti lavar,
Ne trar l’aqua, nè far pan;35
No vol far altro come impir el gargatton.
Se ho, da dir la verità,
Quant ’a mi tegno opinion,
Ch’è la fia del parentà
De Ser Todero Sfondron.40
Se mi vago al bastion,
Che la sapia dove son,
La me vien a scaturar
Con un pezzo de baston
E scomenza a bastonar45
Col dir: furfante, se ti no mudi pensier,
De lassar el magasen
E vegnir da tua mugger,
Non la andarà sempre ben;
Ti urtara’ in tun cornoler.50
Quando vago a reposar,
La me lassa indormenzar,
E po subito al taschin,
Procurando de robar
Sempre qualche grosetin.55
De questo tasa, perchè quasi per il più
Par che ch’i abbi stoppecà
De far tior de mezz’ a nu:
Col mario s’è indormenzà
Se spartise, e po tiol su.60
Se la sera vado a cà
La retrovo immusonà
Con un brazzo de grugnon.
Se ghe digo: vien in qua,
La va in t’ un altro canton.65
Se la carezzo, tutto el ben l’azetta in mal;
Se ghe domando e cosir,
La me porta l’orinal
Se domando el spolverin
La me porta el caramel.70
No la metteria un tacon,
Nè a braghesse, nè a zibon.
La poderia ben pregar,
La me dise: Sior buffon,
Missier, no, che nol voi far!75
La me strapaza, stago pezo de un garzon;
Chè quando ch’ el nol vol star
El va via dal suo padron:
Ma mi se el volesse far,
No sta ben, e nol par bon.80
Mi l’ho tiolta per amor,
Ma la gardo con dolor:
Non ho mai un dì de ben,
Sempre sto misero cor
Pien de tosego e velen.85
Oh quante volte de mia man chiapo un pugnal
Per farme in mezo del sen
Una ferida mortal;
Ma, saven quel che me tien?
Ch’ ha paura a farme mal.90
Sicchè l’ho considerà
Ben missiada e tamisà.
Mi no trovo altro destin,
Nome se el ciel me la dà,
Soportarla fina al fin,95
Aver pazienza e patìr vita da can,
Finachè la fortuna vol;
Chè un de nu da nostra man
Demo un soldo a un barcariol
E che ne butta a Muran.100
Deh legiadra giorentù,
Recamada de virtù,
Primachè ve maridè,
Pensè quel che importa più,
Avantichè v’intrighè;105
Perchè stè certi, che co è fatto el pettolon,
Questo no vel pol desfar
Nè murer, nè marangon,
Ma bisogna sospirar
Fin al ultimo bocon.110
Ma perche col mio cantar
Mi no ve vorria stufar,
Con el vostro bon amor,
Mi vogio reposar,
E restarve servitor,115
Pregando el cielo che ve dia felicità,
Che ve varda ognun de vu
Da mugger, che sia ostinà,
Perche questo quasi el più ...
La canzon fenisse qua!120