No posso far o bianca colombina
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Canzoni | Edission e fonte ▼ | Amor, che stastu à far, orbo, zuetta → |
.jpg)
Che no te vegna à veder sviscerao,
Cusi la sera, come la matina,
Quel vostro viso m'ha tanto incerao,
Che si l'aiuto non sarà à corando,
Me troverè'l bonigolo ingropao.
Si vago per la via a caminando,
I spiriti se drezza verso vui,
Chel me xe forza venirve duniando.
Vu savè quel che son, e quel che fui,
Di Mazorenti, da Buran de mar,
Come da tutti e semo cognossui.
O fia mia, scoltè'l mio favelar,
Volzè la fantasia a i dolci motti,
Che voio un poco con vu rasonar.
Credeu forsi che sia de quei mal cotti
Homeni grossolani, e scognoscenti,
Che rompe l'amicitia in quattro botti.
Cuor mio vardè, mi son de quei brighenti,
Che i podè manizar, che sempre i tase,
Si ben vossè cavarghe tutti i denti.
Suor cara, mi ve prego sel ve piase,
Che femo de do un, incorporao,
E si ve don el fitto de tre case;
Altramente, mi e muoro desperao.