Leggende fantastiche popolari veneziane/VIII

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
100 percent.svg
Qualità del testo: sto testo el xe stà trascrito e rileto.
VIII. De la mare de San Piero che la vien fora da l’inferno oto giorni ogni ano.
1875
←  VII Edission e fonte ▼ IX  →

[p. 21 modifica]VIII. — De la mare de San Piero che la vien fora da l’inferno oto giorni ogni ano.

San Piero gaveva so mare, che la giera ’na cativa dona. La giera avara, maldiçente, invidiosa e la gaveva tuti i sete pecati mortali; ela no fava mai ’na bona opara, e no ghe fava pecà nissun, e no la dava gnente a nissun. In tuto ’l tempo de la so vita, no la gà fato altro de carità, che de darghe a un povareto un poro de zievola.

Ma anca ela la xè morta.

Morta che la xè, el Signor el l’à mandada a l’inferno. Dunque sto so fio, che giera in paradiso, el gaveva ’na passion granda, parchè so mare giera a l’inferno, e sempre ’l pregava el Signor, e no ’l fava che scongiurarlo, perchè el ghe fazze sta carità, che el la levasse da l’inferno e el la metesse magari in qualche canton del paradiso, o almanco ch’el la provasse, che, chi sà, la se ne rivedesse. Dise ’l Signor: «Ma come vusto che fassa a torla via, che no la gà mai fato un opara bona, che no la gà fato ’na carità, e no la gà fato gnente de ben al mondo?» — Dise San Piero: ― «E pur qualche opara bona la gavarà fato!» ― Dise ’l Signor: ― «No la ghe n’à fato gnanca una; mi adesso tornarò a vedar su i mii libri.» — E là, el varda su un gran libro, e el vede che, sta mare de San Piero, in tuto ’l tempo de la so vita no la gà fato mai gnente de ben, e che no l’à fato mai carità, altro che la gà dà un poro de zievola a un povareto. Dise el Signor: — «Ben! Per sto poro de zievola, ghe acordarò che la possa vegnir [p. 22 modifica]de suzo, rampegandose per sto poro; ma ti vedarà, che anca quà la gavarà la so invidia.» — E là, el Signor cala zozo sto poro, e ela se rampega. Atorno de ela se ghe taca tante altre anime, e ela zò peae a uno, zò peae a l’altro e zò peae a st’altro e a tuti, disendoghe: — «Andè via, che vualtri no el ve ciama.» — Dise el Signor a San Piero: — «Astu visto? Astu visto se mi gaveva razon, e se la xè sempre istessa e la gà sempre la so cativeria?» — E alora, el Signor l’ à molò el poro, e ela le xè andada sul profondo de l’inferno.

Per riguardo pò de San Piero, el gà permesso che una volta l’ano, co’ xè el dì de San Piero, ela la vegna fora e che la staga oto giorni a remengo per el mondo; e infati la vien fora tuti i ani, e in sti oto giorni che la stà fora, la ghe ne fa de tute le sorte, e la ne fa tanto e tanto tribolar.