Pagina:Leggende fantastiche popolari veneziane.djvu/21

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.


VIII. — De la mare de San Piero che la vien vien fora da l’inferno oto giorni ogni ano.

San Piero gaveva so mare, che la giera ’na cativa dona. La giera avara, maldiçente, invidiosa e la gaveva tuti i sete pecati mortali; ela no fava mai ’na bona opara, e no ghe fava pecà nissun, e no la dava gnente a nissun. In tuto ’l tempo de la so vita, no la gà fato altro de carità, che de darghe a un povareto un poro de zievola.

Ma anca ela la xè morta.

Morta che la xè, el Signor el l’à mandada a l’inferno. Dunque sto so fio, che giera in paradiso, el gaveva ’na passion granda, parchè so mare giera a l’inferno, e sempre ’l pregava el Signor, e no ’l fava che scongiurarlo, perchè el ghe fazze sta carità, che el la levasse da l’inferno e el la metesse magari in qualche canton del paradiso, o almanco ch’el la provasse, che, chi sà, la se ne rivedesse. Dise ’l Signor: «Ma come vusto che fassa a torla via, che no la gà mai fato un opara bona, che no la gà fato ’na carità, e no la gà fato gnente de ben al mondo?» — Dise San Piero: ― «E pur qualche opara bona la gavarà fato!» ― Dise ’l Signor: ― «No la ghe n’à fato gnanca una; mi adesso tornarò a vedar su i mii libri.» — E là, el varda su un gran libro, e el vede che, sta mare de San Piero, in tuto ’l tempo de la so vita no la gà fato mai gnente de ben, e che no l’à fato mai carità, altro che la gà dà un poro de zievola a un povareto. Dise el Signor: — «Ben! Per sto poro de zievola, ghe acordarò che la possa vegnir