Leggende fantastiche popolari veneziane/IX
|
1875
|
|
Edission original: |
Leggende fantastiche popolari veneziane, a cura de Domenico Giuseppe Bernoni, Venezia, Tipografia Fontana-Ottolini, 1875 |
|
Fonte: |
| ← VIII | Edission e fonte ▼ |
IX. — De una burla fata dal Massariol1.
A un tempo ghe giera ’na dona maridada, e sta dona la gaveva tre fioi, e uno pissinin da late. So mario gaveva un mistier che ghe tocava alzarse de note. Dunque ’na note el se alza e el va via. Co’ el xè su ’na strada, el sente sigar: oah... oah... El varda cossa che xè, e el vede ’na sporta; e el tol sù sta sporta, e el vede che drento ghe xè un putelo. Dise sto mario: — «Un putelo!» — Giera un fredo teribile, e lu el ciapa sta sporta e el core a casa disendo in fra de elo: zà che mia mugier xè da late, ghe porto anca questo, che la lo levarà e sarà quel che Dio vorà. Infati el va a casa co sto putelo e el ghe dise a so mugier: — «Ciò! varda che gò catà sto bambin drento in sta sporta.» — E ela ghe dise: — «Oh, cossa ve penseu? ghe n’avemo dei altri.» — Dise elo: — «Ben; tienlo, ch’el Signor ne provedarà, e daghe late.» — Infati, la ciapa sto bambin, la lo lava, la lo neta, la lo scalda, la lo infassa, la ghe dà la papa e pò la ghe dà late, e pò la lo mete in cuna arente a st’altro che la gaveva. Dopo la ciapa su e la va in cusina a far i fati sui. Co’ xè la sera vien a casa so mario e el ghe dise: — «Gastu dà da magnar a quel putelo?» — Dise ela: — « Sì! lo gò netà, lo gò infassà e pò gò dà late e pò lo gò messo in cuna arente al mio pissinin.» — Ghe dise so mario: — «Ben, andemo che vogio vedarlo.» — E i ciapa suzo e i va tuti dò in camara, e i varda in cuna e i cata le fasse vode senza el putelo. Dise el mario tuto imagà: — «Cossa che possa essar?» — Ela ghe risponde: — «Mi no ghe no sò. Ch’el fusse el Massariol?» Alora i va al balcon e i vede a la lontana uno, che el pareva un omo e no el giera un omo, che el ghe sbateva le man e el ghe rideva sul muso e el li sbufonava, con dirghe ch’el ghe l’à fata, e che la gà lavà el culeto, che la gà dà la papa, e che la gà dà le tete; e pò i vede che, dal dito al fato, sto omo, che no giera omo, el sparisse2.
- Note
- ↑ Massariol, spirito folletto.
- ↑ Sul soggetto di questa leggenda, la buona popolana aggiunse queste altre particolarità:
— «El Massariol ghe ne fava de tuti i segnati. De lo volte el se fava in cordela, e de le volte el se fava in t’un gemo de asse, e co’ le done che lo trovava se lo meteva in sen, lu el ghe diseva: tòco tetine, tòco tetine; e lore le fava per tirar fora sto gemo, e no le se lo catava più. Ogni sera l’andava a passar tragheto, ma sempre vestio difarente. Co’ i lo gaveva butà da st’altra parte, i ghe domandava i bezzi de la parada, e lu ghe rispondeva: caròbole, caròbole, doman te pagarò. E ’l spariva. Le done fava el pan, e le ghe dava ordene al forner che l’andasse a torlo a la tal ora. Ben: a quel ora istessa, invesse del forner andava el massariol, e el trava el subio, come fava el forner, e el toleva sù el pan e el lo portava in mezo a un campo, o su un ponte, o a na riva. Le lavandere le lavava la biancaria e pò le la meteva fora a sugarse, e sto massariol ghe portava via corda e biancaria, e el ghe la portava in t’un altro logo più lontan. Co’ el gaveva fato ste fature e che sto done le trovava la roba, lu el se tirava a la lontana, e là el ghe sbateva le man, e el ghe rideva sul muso, e el le sbufonava, e pò el spariva.
El massariol no ’l gà fato mai gnente de cativo, e ghe piaseva ridar e scherzar e sbufonar la zente. Anca lu el xè sta confinà, no se sà dove, dal santo Ufizio: istesso che le striglie, le fade e i maghi.» —
FINE.