Leggende fantastiche popolari veneziane/VII
|
1875
|
|
Edission original: |
Leggende fantastiche popolari veneziane, a cura de Domenico Giuseppe Bernoni, Venezia, Tipografia Fontana-Ottolini, 1875 |
|
Fonte: |
| ← VI | Edission e fonte ▼ | VIII → |
VII. — De un signor che gà dà ’na peada a un cragno da morto.
A un tempo ghe giera un giovine, e sto giovine no fava altro che magnar, bevar e divertirse, perchè el giera rico immenso, e no el gaveva gnente da pensar. Lu el sbefava tuti; elo toleva l’onor a tute le regazze; elo ghe ne fava de tute le sorte, e el giera stufo de tuto. Un giorno, fra i altri, el se pensa de dar un gran pranzo, e là, l’invida tuti i so amissi e na quantità de done, e tuti i so conossenti.
Intanto che i prepara sto pranzo, elo va a spassizar, e el va zò per ’na strada in dove che ghe giera un simitero. Cussì a caminando, el vede che ghe xè in tera ’na crepa da morto. El ghe dà ’na peada a sta crepa, e pò el se ghe aviçina, e el ghe dise co sbefo: — «Ti vignarà anca ti, no, sta sera a sena da mi?» — E el tira de longo e el va via, e el va a casa. A casa giera a l’ordene el pranzo, e giera capità tuti i convitati. Là, i se mete tuti a tola, e i magna e i beve a son de musica, e i se diverte alegramente.
Intanto vien la meza note, e, co’ xè proprio el punto de la meza note, i sente a dar un sonon de campanela. Va i servitori a vedar chi xè, e i vede che xè ’na fantasma granda. Dise sta fantasma ai servitori: — «Diseghe al conte Roberto, che so’ quelo che el gà invidà sta matina a sena.» — I servitori va su dal paron a nonziarghe che xè ’na fantasma granda che la dise che la xè quelo che sta matina lu el gà invidà a sena. Dise ’l paron: — «Mi? Tuti quei che gò invidà, xè quà, e altri mi no gò invidà.» — Dise lori: — «S’el vedesse! xè ’na fantasma che fà teror.» — Alora a sto giovine ghe vien in mente ch’el possa essar quel morto, e el dise ai servitori: — «Presto, presto: sarè i balconi e le porte, che no ’l possa vegnir drento.» — Sti servitori và a serar da per tuto; ma apena che i gà serà, eco che se sbalanca porte e balconi, e che sta fantasma vien drento. La va de suzo in dove i giera che i senava, e la ghe dise: — «Roberto, Roberto! No t’à bastà profanar tuto; ti gà volesto anca disturbar i morti: xè vegnuo el fin!» — Tuti spaventai, chi scampa per de quà, chi scampa per de là, chi se sconde e chi se buta in zenocion. Alora sta fantasma la ciapa per el colo sto Roberto, e la lo strangola, e la se lo porta via con ela; e cussì el gà lassà l’esempio, che no xè parmesso sbefar i povari morti.