E el tira de longo e el va via, e el va a casa. A casa giera a l’ordene el pranzo, e giera capità tuti i convitati. Là, i se mete tuti a tola, e i magna e i beve a son de musica, e i se diverte alegramente.
Intanto vien la meza note, e, co’ xè proprio el punto de la meza note, i sente a dar un sonon de campanela. Va i servitori a vedar chi xè, e i vede che xè ’na fantasma granda. Dise sta fantasma ai servitori: — «Diseghe al conte Roberto, che so’ quelo che el gà invidà sta matina a sena.» — I servitori va su dal paron a nonziarghe che xè ’na fantasma granda che la dise che la xè quelo che sta matina lu el gà invidà a sena. Dise ’l paron: — «Mi? Tuti quei che gò invidà, xè quà, e altri mi no gò invidà.» — Dise lori: — «S’el vedesse! xè ’na fantasma che fà teror.» — Alora a sto giovine ghe vien in mente ch’el possa essar quel morto, e el dise ai servitori: — «Presto, presto: sarè i balconi e le porte, che no ’l possa vegnir drento.» — Sti servitori và a serar da per tuto; ma apena che i gà serà, eco che se sbalanca porte e balconi, e che sta fantasma vien drento. La va de suzo in dove i giera che i senava, e la ghe dise: — «Roberto, Roberto! No t’à bastà profanar tuto; ti gà volesto anca disturbar i morti: xè vegnuo el fin!» — Tuti spaventai, chi scampa per de quà, chi scampa per de là, chi se sconde e chi se buta in zenocion. Alora sta fantasma la ciapa per el colo sto Roberto, e la lo strangola, e la se lo porta via con ela; e cussì el gà lassà l’esempio, che no xè parmesso sbefar i povari morti.
