Le ròndene
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Una rama de garofoli rossi | Edission e fonte ▼ | El montanar pacifico → |
– Che vergogna! Ancora in leto?
Me sigava da l'altana
la pacifica Mariana,
che me perde de rispeto...
Sior paron: i è capitade
a le ondese sonade!
― Ci?
― Le ròndene...
– Oh, magari,
digo mi, mostrando i denti;
li credea quei me parenti
che me roba su i afari...
Se el malan no l'è che questo,
corì1 a dirghe che me vesto –
Sora un çiel de primavera
fato a nuvole e figure,
se vedea maciete scure
che filava de cariera,
se sentiva e soni e canti
come de un che el fusse in tanti....
– Oh, parone, come vala?
Le se ferma, le se sponsa...2
Posso, un vermouth, 'na marsala,
quatro fregole de consa,3
posso un par de muradori,
che le aiuta sui lavori?
― Ci... ci... ci... ma grassie tante;
se el savesse come semo
strache morte, e che vegnemo,
ci... ci... ci... da che distante...
Che el ne guarda: sporche, brute,
ma ghe semo quasi tute...
Uh, che brave! Le s'à messo
a la çerca de i so nii,
le faseva pii... pii...
Con parmesso, con parmesso!
Rinforsando la rosaria,
con gran çercoli par aria...
E da l'ultimo dei copi,4
da i più alti baladori5
dove i strologhi dotori
sbusa el çiel coi stelescopi,
da le boche de i camini
che se sforsa a far de inchini...
Dal bordel dei camilioni6
co le strasse7 a la berlina,
da i castei che va in rovina,
da i palassi co i milioni,
a i vaseti ben fioridi
dove ti, Nina, te ridi...
Sbandierando i fassoleti
e batendo le manine,
done, omeni, sartine,
artesani e puteleti,
va sigando8 a le contrade:
i è rivade, i è arivade!
- Note