Lamento di un Tornitore

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
Lamento di un Tornitore
XVI secolo
Edission e fonte ▼
[p. 64 modifica]
LAMENTO DI UN TORNITORE


OTTAVE


Posso ben dir da seno e da dovera
     Che in me malora passo de qua via,
     Che cussì come in prima no ghe gera
     Prosperitae che passasse la mia,
     Per amor to', mecanica, bandiera,
     Paro el corbame ordìo d'una galìa,
     E se no avesse cressù un pasto al zorno
     Pareràve una gata seca in forno.
Me luse i ochi che paro intorbiao,
     Me cola el naso e me pizza la testa;
     Mo, co un vol ben el vien sì desdolao!
     Pota! sto amor mo l'è la bela festa!
     Un Strologo m'à ben pronosticao
     Che per Done dovèa spigar l'agresta!
     Ma i soldi, el baticuor e l'angonìa
     Che ti me dà, xe 'l manco mal che sia.
Mi che gera uso a far la vita in giava,
     E no veder mai Done, Dio sa quando,
     E co vedea un che se imbertonava
     Ghe dea da gonzo la mare d'Orlando,
     Adesso tuti quei che me sogiava

[p. 65 modifica]

     Zioga co mi a le bela de remando.
     Ò sogià i altri un tempo da scaltrìo,
     E adesso ognun ride del fato mio.
M'ò inamora pensando che se fesse
     I fati soi a star imbettonai.
     Diseva in fra de mi: pota, se avesse
     Una signora co' à sti altri sbisai,
     I Sabi co le Feste che recresse
     Stassimo pur sul zuogolo abrassai!
     Mo, no vagio un quatrin da che t'ò abua,
     Cussì mai no t'avessio cognossua!
Tra el sospirar, tra el farte candelieri,
     Tra el forte brassolari de mìa man,
     Oltra che guasto le ponte dei feri,
     Consumo el tempo che vadagno el pan;
     E me n'ò acorto con me dano geri
     Che andèti da l'ebreo col cofetan:
     Mo, che mal segno fu, porca, quel mio,
     Quel primo dì che mai t'ò vista a Lio!
Le me' camise de botana fina
     Che me ò fate al viazo de Stiria,
     Per el dolor, traditore, sassina,
     Xe tute strazze, e mai xe stae in lissìa;
     Che tra 'l suor, le lagreme e la orina
     Che buto quando son in angonìa,
     Le xe vegnue, che se no me provede
     Vòi ben bater brochète co' fa fredo!
L'altra sera stagando presso al fogo

[p. 66 modifica]

     E magnando una sopa de frisopo
     M'ò recordà d'aver visto in t'un liogo,
     (Lezendo un dì le Favole de Isopo)
     Che una galina à fato star un cuogo,
     (Esempio a quei che se presume tropo)
     Ma qua una vaca fa star un lion,
     Che xe più estrema comparazion!
Se vago in Piazza, vago per san Basso
     Per no passar davanti l'armamento,
     Che daspò che son lindo no ghe passo
     Perchè la povertà tiol l'argomento.
     Vaga per quando avea tut'el me spasso
     De spassizar col mio pugnal d'arzento!
     Mo, chi vive da bravi e vol Signora
     Vien a sto passo, e molto pezo ancora!
Solea la Festa con la grotolina
     Co 'l me garzon laudar a svogazzando,
     Ora con Togni, ora con la palina
     Passar el tempo per no star de bando;
     Adesso mo, ogni festa de matina
     In liogo de l'andar atorziando
     Vegno al macel, vegno a la becaria,
     Che cussì casa toa me par che sia.
Mi me ò fato segnar da strigarìe;
     Madesì, tanto pì bogie el lavezo!
     Che al to' martelo, a le calcagnarìe
     Ogni ceroto o medesina è pezo!
     Vogio pì presto aver cento ferìe

[p. 67 modifica]

     Che un pegio sol, che digo un? che mezo;
     Che 'l despiaser che vien da la Signora
     Xe pezo che pugnal, che dalaora!
L'altro dì me dioleva el lai zanco.
     (Za che bisogna che 'l me mal te conta)
     Son corso a un Zaratan che gera in banco,
     E ò dito, mistro, vardè se ò la ponta.
     Lu m'à vardà in tel viìso, e à dito franco:
     Zugarò pegno, senza che desmonta,
     Che la to dogia nasse da una fia,
     E no da ponta, e no da malatia.
Lavaure de cao, scarpe, e laùto
     Me costa un stato co sto amor novelo;
     Che per parer tilao consumo tuto
     El mio vadagno e fazzo el gavinelo;
     Mo, corde, scarpe, e lavaure buto,
     E la vita, ch'è pezo, anca al bordelo;
     De sorte che consumo le zornae
     I danari, l'onor, la sanitae.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Lamento_di_un_Tornitore&oldid=68059"