Lamentazione al Prefetto Galvagna pel Blocco di Venezia
|
1812
|
|
Edission original: |
Pietro Buratti, Poesie e satire di Pietro Buratti veneziano, corredato di note preliminari ed annotazioni scritte dallo stesso autore, Amsterdam, J. Loocke, e figlio, 1823 |
|
Fonte: |
| ← Canzonetta liberissima per musica | Edission e fonte ▼ | Canzonetta libera per musica → |
Co le lagrime sui ochi
E col cuor tuto strazzà
Puso in tera i mi zenochi
E domando a vù pietà.
Per la patria la domando
Che xè in fregole ridota
Che va in coro sospirando
Che ghe manca la pagnota.
Per la patria che Regina
Del so mar un dì xè stada
Finchè un beco de rapina
Senza un corno la lassada.
Senza el corno che valeva
Assae più d'una corona
Che per tuto la rendeva
Rispetabile matrona.
Che dai ani cariolà
Benchè rè de tutì i corni
Su l'altar de libertà
L'à finio da porco i zorni.
Gran memorie, consegier!
Per chi à visto sto paese
Sede un tempo del piacer,
Rovinà dal mal francese!
Per chi in mente gà la storia
De sto povero paluo
Dopo secoli de gloria
E venduo, e rivenduo.
Per chi à visto el rosto infame
De la fezza democratica
Superar l'ingorda fame
De la fezza aristocratica.
Per chi pensa che Francesco
Gera zà paron de nù
E che a un grosso osel todesco
Se ne dava in schiavitù.
Co ste buzzare inganai
Se balava el minueto
Per un palo infatuai
Che à durà manco d'un peto.
Mi no vogio su sti mali
Farve quà da Geremia
I xè tropo universali
Per cuniarve un'Elegia.
I xe fioli inseparabili
D'una macchina disciolta
I' xè mali ireparabili
Vien per tuti la so volta.
Come l'omo ogni governo
Ga piaceri, ga dolor
Gnente al mondo ghe d'eterno
Tuto nasse, vive e mor.
Vogio ben che i peruconi
Carghi i fusse de pecai
No lo nego, ma cogioni?
Tropo avanti semo andai.
Tropo meterne a le prove
Per saldar quel so librazzo
Vol da l'alto el padre Giove
Tropo el fà de nù strapazzo.
Da l'inglese prepotente
Xè in caena messo el mar
Da la tera non vien zente
No vien roba da magnar.
L'orbo, el zoto, e l'impiagà
Come prima và cercando
La bandia mendicità
Torna fora, e sta de bando.
Su l'ancuzene el martelo
Più dal fravo no se pesta
Ogni artista varda el cielo
Sfregolandose la testa.
El paron sà avezzà solo
A servirse come el pol
Ai tragheti no i fa nolo
E bestemia el barcarol.
Tase el Foro, el Magistrato
E ghe resta drento in gola
Senza fruto a l'avocato
El bel don de la parola.
Ogni zorno pien de fufa
El signor bate la luna
Col governo el fa barufa
Per salvar la so fortuna.
No xè i bezzi che un'augurio
O de imposte, o de preson
E tra i numi el Dio mercurio
Spiega solo protezion.
Consegier la strenze assae
Consegier, per Dio che tremo
Che a ste misere palae
No ghe resta apena el remo.
Che in mancanza de biscoto
Pezo ancora dei soldai
No dobiemo de sto troto
Magnar sorzi scortegai.
O che quadro se ne toca
Sto gran calice ingiotir?
Perdonè se el pelo d'oca
Mi vè fazzo ancuo vegnir.
Se copà da tanti mali
El vernacolo mio pletro
Se desmentega i so sali
E v'intona un novo metro.
Lo sò ben che al limbo semo
Lo sò ben che vita o morte
Aspetar dunque dovemo
Dai caprici de la sorte.
Che ridoti senza un bezzo
Perchè abiemo un dì vitoria
Sa da metarghe un gran prezzo
Nel vocabolo de gloria.
Che la lota xè ostinada
E che arbitrio no ghe avanza
A chi fede ga zurada
Al Sovrano de la franza.
Ma so ancora che natura
Vol in tuto la so dose
Che in sta oribile tortura
La pol forse alzar la vose.
Parlo a un omo de talenti
Parlo chiaro e son sicuro
Che no passa i mi lamenti
I confini de sto muro.
Che bandia da tuto el mondo
In sta tavola in sto logo
Co un filosofo de fondo
Verità pol farse logo.
Quel bel cuor fato de pasta
Spalanchelo Consegier
Zà lo so ch'el ve contrasta
Coi doveri del mestier.
Sìene d'argine a l'urgenza
Del bisogno militar
Qualche drama de clemenza
Nel dirito feghe entrar.
Che zà presto da sta note
Un bel zorno spunterà
E a le barbare so grote
I nemici tornerà.