Pagina:Poesie e satire di Pietro Buratti veneziano.pdf/24

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

Che in mancanza de biscoto
     Pezo ancora dei soldai
     No dobiemo de sto troto
     Magnar sorzi scortegai.
O che quadro se ne toca
     Sto gran calice ingiotir?
     Perdonè se el pelo d'oca
     Mi vè fazzo ancuo vegnir.
Se copà da tanti mali
     El vernacolo mio pletro
     Se desmentega i so sali
     E v'intona un novo metro.
Lo sò ben che al limbo semo
     Lo sò ben che vita o morte
     Aspetar dunque dovemo
     Dai caprici de la sorte.
Che ridoti senza un bezzo
     Perchè abiemo un dì vitoria
     Sa da metarghe un gran prezzo
     Nel vocabolo de gloria.
Che la lota xè ostinada
     E che arbitrio no ghe avanza
     A chi fede ga zurada
     Al Sovrano de la franza.
Ma so ancora che natura
     Vol in tuto la so dose
     Che in sta oribile tortura
     La pol forse alzar la vose.
Parlo a un omo de talenti
     Parlo chiaro e son sicuro
     Che no passa i mi lamenti
     I confini de sto muro.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/24&oldid=58367"