La sioreta persa nel bosco
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El fogolar del sono | Edission e fonte ▼ | La passe del brol → |
– La gran bela matina!
Davanti a sto museto,
da l'aria birichina,
che frugna nel boscheto
come 'na usertolina
in çerca de un bisseto,
i albari i se inchina
dal gran che i g'à rispeto...
E i putei che la vede,
e la pastora bona
dal cor lustro de fede,
sconti de drio 'na sesa
i dise: la madona,
l'è scapà via da ciesa!
I fonghi da l'ombrela
e le olane[1] più sconte
i domanda: ci èla?
― De là, de là dal monte
sona una campanela:
i'è le vache del conte,
che passa la stradela,
a drio par èssar monte.[2]
Ma el sol che ne bufona,
par sassinar la festa,
eco che 'l se imusona...
Le nuvole se ingresta,
piove, spiansisa, tona...
La gran bruta tempesta!
– Cosa farà sta siora
davanti al tempo bruto?
Volìo che la me mora
così, sensa costruto?[3]
Bisogna che la cora
in dove che gh'è suto,
e, guai, se la vien fora
anca par un minuto!
I fonghi – a ti canèla –
da bravi cavalieri,
i vol darghe l'ombrela;
i osei fa «pissi, pissi»...
Tra l'umido e i pensieri
ghe s'à desfado i rissi!
Torna el sol nel boscheto
e va l'usertolina
in cerca de un bisseto...
La nostra fregolina.
fermandose al fosseto,
co i dei de la manina
la se fa su un risseto...
La gran bela matina!
E i putei, che la vede,
e la pastora bona
dal cor coto de fede,
ciciolandose in recia,[4]
i dise: la madona
l'è drio che la se specia!
- Note