La regata (Riccardo Selvatico)
|
Edission original: |
Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910 |
|
Fonte: |
Indice:Selvatico - Commedie e Poesie Veneziane, Milano, Treves, 1910.pdf |
| Edission e fonte ▼ |
No gh’è ne la storia
Del mondo una festa
Più bela, più splendida,
Venezia, de questa:
Incanto de popolo,
De re e imperadori,
Delizia, martirio
De artisti e scritori,
Superba memoria
De un tempo passà.
Inutile invidia
De cento çità!
A l'ultimo ragio
Del sol che se sconde,
A l’aria che alzandose
Dal mar ghe risponde,
Se sventola in gringola,
Più alegri, più bei,
Se sbate, se intorcola
Damaschi e tapei:
Su l’alto patrizio
Balcon destirà
Se dondola in boria
L’arazzo fruà.
Da barche, da sandoli,
Da rive e pontoni,
Sporzendo dai pergoli,
Strucai sui balconi,
De veci e de zoveni,
De mare e fradei,
De spose, de santoli,
De none e putei,
Per tuto de popolo
Un’onda, un tapeo,
Che varda, che spasema,
Che segna col deo.
Sbassai su le forcole
Dei so gondolini,
Su l’aqua che palpita
Sbatendo i scalini,
I svola in t’un impeto
De schene e de brazzi,
Traverso el miracolo
De cento palazzi;
I svola fra un nuvolo
De piume, de fiori,
De sede, de stràssini,
De veli, de ori.
L'è un lampo; l’è un ultimo
Istante supremo;
Za i sfiora la machina
Co’ un colpo de remo,
E saldi in garetoli,
I spianta da tera,
I sventola in aria
La vinta bandiera:
Avanzo d’un popolo
Ormai tramontà,
Eredi de un sangue
No mai bastardà!
Le barche in t'un atimo
Co’ furia, co’ pressa,
Vogando, molandose,
S’incastra, s’intressa;
Le s-cioca, le scricola,
In mezo a un fracasso
De viva, de ràdeghi,
De zighi, de ciasso;
Sbordèla sul sandolo
Che fa maresele,
Ciapae per le cotole,
Tosete e putele.
Soride ninandose
La dama butada
In trasto a la gondola
De vecia casada;
L’amiga dal pergolo
Fodrà de veludo,
Co’ un segno de ventola
Ghe manda un saludo;
Cassae come refoli,
Patrizie, matrone,
Regine de l’aqua,
Vien via le bissone.
E a l'onda che subito
Festosa, giuliva,
Saltando, rompendose,
S-ciafiza la riva,
La gondola vecia
Che dorme ligada,
Dai ani, da strussie
Scavezza, fruada,
Se svegia in rebegolo
E fata putela
La sbate la sbessola,
La salta anca ela.
Adasio le gondole
Scantona nei rii
E ciassi e baldorie
Za more sfinii;
Va via sparpagnandose
Le barche, i batei,
E strachi se picola
Damaschi e tapei;
Un’ombra, un silenzio
Se slarga in Canal,
Su l’aqua no bagriola
Che qualche feral.
Xe note e xe sofego;
Ne l’aria in bonassa
Se sente perdendose
Un taco che passa;
I ciama... ne l’aqua
Se specia un lumeto
Che a pian, senza strepito,
Traversa el tragheto;
Su l’alto patrizio
Balcon destirà
Più straco se picola
L’arazzo fruà.
Ma in fondo, ne l’aria,
Se ilumina un arco;
Xe i mile che sfolgora
Ferai de San Marco;
Ne ariva de musica
Un eco distante...
Xe el cuor de Venezia
Che ancora festante,
Le prove, le glorie
Pensando de un dì,
Là in Piazza no palpita
Che, bela, per ti.
Ah no, ne la storia
Del mondo una festa
No esiste più splendida,
Venezia, de questa:
Incanto de popolo,
De re e imperadori,
Delizia, martirio
De artisti e scritori,
Superba memoria
De un tempo passà,
Inutile invidia
De cento çità!