La question
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← La sentenza | Edission e fonte ▼ | La falsa aparenza → |
Ghe n'à tanti per dia baco
Zovenoti ogni paese
Ignoranti più de taco
Che xè pieni de pretese,
Teste vode come zuche
Che spua sempre una sentenza,
Che ve sbara fanfaluche
Con un'aria d'eloquenza;
Che ghe cazza in ogni dialogo
Qualche caso che gh'è nato,
Che vien fora col catalogo
De l'imprese che i gà fato;
Musi roti, sfrontadoni,
Senza un fia d'educazion,
Che da gnente no i xè boni,
E che insulta la rason,
Che se spazia per Dotori,
Per Baroni, per Marchesi,
Che a sentirli parlar lori
I à zirà cento paesi;
Teste vode, lo ripeto,
Che se crede Ciceroni,
E dei libri, ghe scometo,
No i conosse che i cartoni.
Se trovava un de costori
A una tal conversazion,
Ne la qual da do Signori
Se faceva la question.
Se Milan compreso tuto
De Venezia sia più belo,
O se invece el sia più bruto
Confrontando, questa a quelo.
Senza gnanca esser chiamà
Lu ghe mete la bardela,
Asserindo da sfrontà
Che Venezia xè più bela,
Che Milan no gà de bon
Che 'l so Domo e strade larghe,
E che a questa in conclusion
No gh'è gnente da scartarghe; ―
Bravo — alora dise quelo
Del giudizio favorìo —
Là ghè i pezzi da cartelo
Più famosi, e xè fenìo.
El detaglio la ghe fazza
De le cosse del paese;
De la riva, de la piazza
Dei palazzi, de le Chiese.
La ghe diga francamente,
Oltre al belo material,
Se se dà più bona zente,
Se a Venezia se sta mal; —
Quel lasagna se scansava
Co modestia assae pulito,
Ma quel'altro lo sforzava
A parlar, finchè 'l gà dito: ―
De contarghe per minuto
Veramente no so in caso,
No ò podesto veder tuto,
E per questo dunque taso;
Do tre volte che so andà
De un amigo in compagnia
Go dovudo apena entrà
Tacar soto, e vegnir via: —
Vie che bomba budelona!
(Tuti quanti esclama alora,)
Tropo grosse, la perdona,
La le lassa vegnir fora;
Tropo grosse mo la Veda
La destira le lasagne,
E no semo, la lo creda,
Vegnui zo da le montagne;
Lo sà sina i mii stivali
Che Venezia xè piantada
Tuta quanta sora i pali
E da l'acqua contornada
La me diga, quando vala
Co l'amigo a far del moto?
In laguna quando fala
I Cavali tacar soto? —
L'è restà senza eloquenza
Quel marcante da falope
E gà parso esser prudenza
De tor suso el dò de cope.
Zovenoti negozianti
De sta roba de valor
Abiè sempre el spechio avanti
Del famoso viagiator.