La falsa aparenza
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← La question | Edission e fonte ▼ | El maldicente → |
Se creder dovemo
Ai libri stampai,
Che gh’era trovemo
4Nei secoli andai
In Spagna un Convento
Grandioso de Frati,
Che i zorni là drento
8Viveva beati,
Bevendo, e magnando
I megio boconi,
E avendo dà el bando
12Ai gusti baroni;
Lontani dal vizio,
Donai tuti al Cielo,
In coro l’Uficio
16Diseva con zelo;
I gera esemplari,
Famosi nei Canti,
Atenti ai so altari,
20Divoti ai so Santi.
La fama sti Frati
Godeva nel mondo
De gran leterati,
24De quei che spua tondo,
E ognun li stimava
Sapienti omenoni
Che i Orazj eclissava,
28I Ovidj, i Maroni.
Un Padre del logo
Che gera pietoso
D'acordo col cogo
32A un tal bisognoso
Che lu conosceva,
Ghe dava el disnar,
Perchè nol gaveva
36Mistier da campar,
E sempre in scondon
Magnava de tuti
Manestra, capon,
40El rosto, i so fruti.
A dar la spanzada
El stava soleto
Dabasso in intrada
44Ficà in t'un logheto;
Ma un zorno per baco
El logo xè stà
Dai frati co un saco
48De risi occupà,
E quando al convento
Al solito el xè,
Nol pol andar drento
52La chiave no gh'è.
Sorpreso lu resta
Co tanto de naso,
Se grata la testa
56Pensando al so caso.
El Padre pietoso
Che gera informà
El capita zoso
60Da quel desparà,
Lo chiapa per man
Ghe dise vegnì
Facendo pian-pian
64Desuso co mi:
Lu alora contento
Ghe fa compagnia,
I va come 'l vento,
68I xè in libraria.
Ma quando el se vede
Là drento arivà,
De esser el crede
72Ben presto squagià,
E al Padre gà dito: —
Sarò da sti frati,
Se stago in sto sito,
76Che xè leterati,
Che studia dì e note,
Sorpreso, e in alora
A furia de bote
80Sarò cazzà fora.
De spasemo pien
Scampar vol a un trato
Ma st'altro lo tien
84Ghe dise: — seu mato?
Stè pur col cuor quleto,
No stè a far sussuro,
Che quà ve prometo
88Sè più che sicuro:
No s'à mai averto
Ste gran librerie
Che i ragni a coverto
92De imense scarpie,
Nè xè gnanca cani
Venudi quà drento
Da tanti gran ani
96Che so in stò convento: —
Col sente sta cossa
El resta copà;
Ma el Padre una scossa
100In bota ghe dà,
Disendoghe: — Amigo
L'è proprio cussì,
E quel che ve digo
104In mente tegnì.
Per ben giudicar
Ghe vol gran prudenza,
Nè pol mai bastar
108La sola aparenza.