La predica
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El palo | Edission e fonte ▼ | Fra Giocondo → |
In Chiesa a san Simon,
Otant'ani sarà,
Un degno sacerdote, un talenton,
Su l'amor coniugal ga predicà
5Dando con vari esempi
Da vedèr
Come che in tuti i tempi
Una trista muger
In oltragio del santo matrimonio
10Fa che 'l mario più bon,
Che un deciso paston
Para un demonio;
E basandose a testi de Scritura,
Che l'aveva imparà,
15Sto assunto l'à provà
Co una bravura,
Co una tal evidenza
Da cavarghe le lagreme a l'udienza,
E da produr l'efeto,
20Le creda o no le creda,
Che da qualche brutissimo difeto
Diverse maridae le se raveda.
Certa siora Crestina,
Che la predica atenta aveva intesa,
25Deventada dai scrupoli chietina,
Da là do zorni ze tornada in Chiesa,
Forsi per pregar Dio
Che 'l la conserva onesta,
E che 'l vogia tegnirghe a so mario
30Le man sora la testa;
E quando vicin d'ela
Menando la cassela
Ze stà Carlo Baronzolo
Alora primo nonzolo,
35Aludendo a la predica sentia
Che gaveva ferio la fantasia,
Senza per gran modestia mai vardarlo,
La ga esclamà — sior Carlo,
Che predica de sesto l'altro dì! —
40E lu — no vorla, l'ò sonada mi. —
L'ignorante ze 'l ritrato
De la mosca, che montada
Su l'aratro, dal mossato
Che l'à vista interogada
45Cossa a far la gera là,
Con un ton de gravità
Ga risposto — il mio pandolo,
Non lo vedi, ariamo il suolo.—