La massima falsa
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Co me penso i tanti spasemi,
Che provava un ano fa,
Vogio dir, co de ti, Nonola,
Gera belo e cusinà,
5Me se inchiava i denti in boca,
Me vien come 'l pelo d'oca,
Ma po digo, e me consolo,
Una sola ne inamora.
Dunque mi ghe ne son fora,
10El pericolo ò passa.
Se se dasse de trovarme
Co una tosa a chiacolar,
Posso adesso cimentarme,
Posso rider, e scherzar;
15S'anca vado in sentimento...
Amoreti del momento!
Ze impussibile scaldarme,
No ghe penso gnanca sora,
Una sola ne inamora,
20El pericolo ò passà.
Confidando in ste mie massime,
Da la sera a la matina,
De Marieta me desmentego,
Son fanatico per Nina,
25Ma con ti, Teresa mia,
Son per perder la partia,
E pur tropo meto in dubio,
Se una sola ne inamora...
Ah ! in pericolo so ancora,
30Son da novo inamorà. —