La gamba rota

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
100 percent.svg
Qualità del testo: sto testo el xe stà trascrito e rileto.
La gamba rota
1857-58
←  El regalo Edission e fonte ▼ El gobo spiritoso  →


[p. 14 modifica]
LA GAMBA ROTA.


A un'academia celebre francese,
     No sò de che paese,
     Dopo vari argomenti
     Tratai da quei dotori,
     5Tizio, dei più sapienti
     Fra de lori,
     Ch'essendo omo de mondo
     I so coleghi conosceva a fondo,
     Se pensa in modo onesto
     10De torli per el cesto,
     E lese co sto scopo una memoria,
     Sogeto de la qual
     Gera la storia
     Su la gamba d'un tal,
     15Che cascando per tera
     Da la bota

[p. 15 modifica]

     Sul fato se l'à rota,
     Ma rota a una maniera
     Che la metà ze stada
     20Da st'altra destacada
     Intieramente,
     Tantochè presto presto
     Chi s'à trovà presente
     Ga dovesto
     25Torselo su de peso
     Per no lassarlo là longo desteso;
     E un omo del mistier
     Chiamà in premura,
     Che chi el fusse no serve de saver,
     30Con estrema pazienza e co bravura
     Mediante un certo ordegno
     In sie minuti ghe l'à messa a segno,
     El ghe l'à ben ligada,
     E po co de la pegola bogente
     35Fra i do tochi de gamba insinuada,
     No fandoghe al paziente
     Sofrir nissun dolor,
     Da vero professor
     In modo ghe l'à unita
     40Che imbota l'è guario,
     E la ga ben servio
     Tuta la vita,
     Ossia altri quarant'ani
     Senza nissun indizio de malani,

[p. 16 modifica]

     45Essendo andà a far tera da bocai
     De setanta passai,
     E avendoghene trenta solamente
     Quando che ghe ze nato l'acidente.
Alora quei dotori tutiquanti
     50Pieni de presunzion, da la paura
     D'esser qualificai per ignoranti
     Sui strani efeti che se dà in natura,
     Sora la storia intesa
     No i ga fato
     55Nissunissimo ato
     De sorpresa;
     Anzi senza comenti
     I s'à mostrà d'acordo persuasi,
     Che no i se possa dar tanto frequenti,
     60Ma che pur se combina de sti casi;
     E ognun per la so parte,
     Secondo el proprio grado de criterio,
     Coi so ampolosi termini de l'arte
     Ga scomenzà sul serio
     65A disputar
     Su la vera rason,
     Che deve generar
     Sta prodigiosa e pronta guarigion.
Ma sicome 'l sogeto,
     70Lo vede ogni balordo,
     Gera fra i maledeti maledeto,
     Cussì tuti d'acordo,

[p. 17 modifica]

     Smaniosi de far pompa de talento,
     Tante buzzare i à dito,
     75Che no le ghe stà drento
     De sto sito,
     Sinchè da le opinion
     Dispari tute
     Ze insorto una question
     80De le più brute;
     Da sciochi i s'à tratà,
     I s'à ben strapazzà
     Fora dei denti,
     E i gera là a mumenti
     85Per vegnir a le man,
     Se Tizio, quel che à leto
     Col fin de far bacan
     La memoria anunziada qua dessora,
     Contento de l'efeto,
     90No fusse saltà fora
     A dirghe a quei dotori:
     — Carissimi signori,
     Prima de proseguir le discussion
     Mi le prevegno,
     95Che la gamba in question
     Gera de legno. —

[p. 18 modifica]



La storiela, ze evidente,
     Ne fa prova
     Che se trova
     100A sto mondo certa zente,
     La qual volendo comparir istruta
     Fa invece la figura la più bruta.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_gamba_rota&oldid=46912"