El gobo spiritoso
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La gamba rota | Edission e fonte ▼ | La confession → |
Otant'ani sarà
Viveva in sta cità
Un gobo, che a ecezion de sto difeto
Gaveva tuto quelo,
5Che a un ente predileto
Pol acordar el Cielo;
Lu gera facoltoso,
Lu gaveva talento,
El gera spiritoso,
10Anzi in sta parte calcolà un portento;
Sempre de bon umor,
Franco, cortese,
Ma severo censor
De le lasagne che ghe ze in paese,
15Ossia de quei meschini
Co la patente neta de tromboni,
Che per esser vestii da figurini
I spera che i li creda ciceroni,
E co insulsi bomò mal aplicai,
20Co qualche dopio senso inconcludente,
Se ritien fermamente
Autorizzai
De meter in ridicolo,
Da sciochi, da indiscreti,
25El gobo, el zoto, el picolo,
E tuti i sfortunai che ga difeti,
Odioso requisito
Che se trova in diversi e in ogni sito.
Un zorno da Florian,
30Dove sto gobo apena capità
Tornando da Milan
Gaveva dispensà
Varie letere scrite da parenti
De alcuni là presenti,
35Certo sior Marco Rulo,
Un zizoloto, un bulo,
Che messo in positura
Da far la so figura
Con chi va drento e fora
40Gera in botega alora,
Vestio per dar nel'ochio
E parer bon
Co un certo veladon
Sie dei sora el zenochio,
45Ochialeto obligato,
Gran mustachi da gato,
Capelo cenerin
Co la cuba a bronzin
Largo de ala,
50Una man in scarsela dei bragoni,
E bagolina in spala,
Che 'l me pareva el fante de bastoni,
Metendo in derision co cargadura
Del gobo la figura
55Per un trato de spirito el ghe dise:
— Ela che fa el postier tanto pulito,
La prego de vardar drento in valise
Se qualchedun dei mii m'avesse scrito —
Senza pensarghe suso,
60Fissandolo in tel muso
El gobo ghe risponde francamente:
— Per ela no go gnente,
I soi che ze discreti,
E che no ga secreti,
65No i ga scrito
Volendo sparagnarme la fadiga,
Ma per altro i m'à dito
Tutiquanti d'acordo, la ghe diga,
Se a caso mai la vede Marco Rulo,
70Che lo gavemo in culo. —
Ze tanto el numero
De sti storditi,
Che in ogni angolo,
In tuti i siti,
75Per far ridicola
Sta bona lana,
Dei gobi simili
Saria una mana.