La fassenda del cor
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El giorno dei morti | Edission e fonte ▼ | El giorno de la passe → |
El cor, leseva un giorno no so in dove,
el Signor l'à fornido de do recie:
con una el scolta le passione nove
e con quel'altra le passione vecie.
E la recia che arbina[1] ste passione,
l'è un magasin de teste bionde e risse,
dove tra bone e tra cative assione,
la çesta de i ricordi se impenisse.[2]
Ma passa el sangue, e quelo el porta via
sti ricordi a tocheti... un anelin,
'na parola... un ritrato, una gasia,
che tegneva el so posto in magasin.
E così, a poco a poco, de sta anda,[3]
co i cavei bianchi un giorno se trovemo,
e le memorie che tegnem da banda,[4]
a poco a poco, le desmenteghemo,
fin che pieni de ràpole,[5] vecioni,
col sangue ciaro come la graspìa[6]
e desperadi in fato de passioni,
se nasa el vento che ne porta via,
e se rusca[7] nel cor.... Su par i muri
qualche mufeta ancora se rampèga....
Persa anca quela, se deventa duri...
– Paron, l'è ora de serar botega!
- Note