La compassion de le miserie umane
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
La compassion de le miserie umane
Xe come la stagion de primavera,
Che coi fiori, e l'umor de le fontane,
4Consola, e dona el gaudio su la tera.
La povertà che sperimenta vane
Spesso le umiliazion de la preghiera,
Che da ela se vede andar lontane
8Le persone de rica e de alta sfera;
Oh! quanto, oh! come, se gode e conforta
Co la pietà ghe fa un soriso, e sente
11Qualcheduno che bate a la so porta!
E co la trova in mezzo a tanta zente
Un'anima cristiana che ghe porta
14La carità che ga negà el potente.