La Lizion

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
La Lizion
XVIII secolo
Edission e fonte ▼
Altra edizion: La Lezion (1817)

[p. 231 modifica]

LA LIZION.


«Che bel cielo, proprio belo!
     La colina stamatina
     Xe superba; fina l'erba
     Par più verde; no se perde
     5Gnanca un fior;
     E st'arieta! benedeta!
     La va al cuor.
Fe un servizio, don Fabrizio,
     Conduselo sto putelo
     10Verso 'l monte per le sconte.

[p. 232 modifica]

     Drio 'l boscheto... l'è un mieto
     E mezzo al più.
     Za ghe giova; po se prova,
     Caro vu.
15Qua el fa chiasso! A spasso, a spasso,
     Che no vogio più sto imbrogio;
     Podè andando, chiacolando,
     Farghe scuola; la parola
     Dà lizion,
     20Stuzzegheghe, scozzoneghe
     La rason.
Dov'el sia mo?... Zise, via
     Col maestro... Che bel estro?
     Xestu mato? zo quel gato...
     25Che sempiezzi, che strighezzi
     Che 'l se tien!
     Oe, la mama che te chiama...
     Va là..., el vien.»
El regazzo gh'è za in brazzo.
     30«La scooleta, presto, Beta...,
     Sta su dreto... tiò 'l pometo,
     Supia el naso... dame un baso;
     Zo 'l colar.
     Via, batochio;... l'abia ochio... (a don Fabr.)
     35E no suar» (al putelo).
El tol suso for da un buso
     De la stala la so bala
     L'à in scarsela una burela,
     Quatro nose, e un bel dose
     40In marzapan,
     El subioto, un pomo coto,
     Piombè in man.
Don Fabrizio tol l'ufizio,
     I so guanti, e marchia avanti
     45Motivando, cantuzzando
     Tantum ergo. Zise a tergo
     In sol - do - re
     Ghe fa fiò - fiofiò - fiofiò
     Col so piombè.
50Scorabiando, matizzando
     Spesso Zise: en diga (el dise)
     Chente chele, tossa xele,
     Sion maento? — L'è un tormento!
     Se nol sa,
     55Zuche tonde (el ghe risponde)
     Tasè là.
I se avanza, e in lontananza
     Là de fronte, a pie del monte,

     Sau chi 'l vede! Palamede,
     60Quel da Como, quel bel omo...
     No capì?
     Quel che gera l'altra sera
     Qua co mi.
Don Fabrizio conosceva
     65Palamede; e fa 'l giudizio
     Che 'l doveva, co 'l lo vede.
     Ma 'l putelo (come spesso
     Fa tre quarti del bel sesso)
     Mala pena l'à vardà,
     70Che ga visto e giudicà.
Oh to gando! (el dise) quando
     A redosso da una ciesa
     El ghe vede per da drio
     Un altr'omo spontar su,
     75Alto tanto più de lu.
     Figureve che sorpresa!
     El lo varda incocalio:
     Vanda, pento, sion maento;
     To le piante gh'è un zigante,
     80Da dio via vien su Golia.
     Capia l'otica ignoranza
     Del putelo, per difeto
     De pensar a la distanza,
     E a la base de l'ogeto:
85Eco (dise don Fabrizio)
     «El mumento mo propizio
     De poder co la lizion
     Scozzonarghe la rason.
     Golia? caro, andemo su
     90E vedemo se l'è lu.»
El ghe branca una manina,
     E i va su per la colina.
     Palamede giusto in quelo
     Fava in zo l'istessa strada;
     95El lo incontra col putelo,
     Ma 'l putelo no ghe bada,
     Che 'l lo vede tal e qual
     Che 'l l'ha visto poco prima,
     Un bel'omo; lu mo stima
     100Più un zigante: natural!
Ma più suso de là un poco:
     «Vegni quà mo, sior aloco,
     (Dise 'l prete) vita mia,
     Questo xe 'l vostro Golia.»
     105E chi vedelo?
     Un ometo, un gobeto,

[p. 233 modifica]

     Alto, longo
     Mezzo brazzo più d'un fongo,
     Che dal sito dov'el stava,
     110Visto là da la pianura
     De do quarte superava
     Palamede de statura.
El regazzo resta là
     Contemplandolo incantà:
     115Golia chento, sion maento?
     To gobeto! l'è un ragneto!
     — Oh l'au visto? imparè, sior,
     E lighevela mo al cuor:
Che bisogna esaminar,
     120Separar e confrontar,
     Per poder ben giudicar.
E pol andar a pati a l'ospeal
     Chi senza st'avertenza misurando
     Confonde co la statua el pedestal:
125L'omo dreto, belo, grando
     Tanto a basso, che qua su
     L'aveu visto? el resta lu,
     Tal e qual l'à Dio formà.
Se va 'l gobo rampegando
     130Per da drio sora de lu...
     Ben; l'è un gobo che à da su,
     Che la goba à sublimà.
     Vienlo zo mo dal so scagno?
     El gobeto, povareto,
     135Resta un ragno. Velo là
Don Fabrizio co giudizio
     La lizion à fenio qua;
     E po a casa col putelo
     A bel belo l'è tornà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_Lizion&oldid=68345"