L'oselo
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← A Rialto | Edission e fonte ▼ | Sfogonada → |
.jpg)
Sicut avis ad alia transvolans et passer quo libet vadens.
Prov. XXVI, 2.
CARI Oseleti che cantè sui piopi
Le glorie del Signor
E andè la note a riposar sui copi
Co la pase nel cor,
Cari oseleti, se anca mi podesse
In libertà svolar,
S'el grave corpo uman no me tegnesse
In tera a caminar,
Cari osei, se gavesse mi le ale,
No aspetaria doman
E andaria senza mai voltar le spale
Lontan, lontan, lontan.
Voria svolar più rapido del vento,
Quanto svolar se pol,
Nel to caro splendor luna d'arzento
Ne la to gloria o sol;
Finchè, guidà da una benigna stela,
Dopo tanto svolar
Me fermeria dove Venezia bela
Ride vardando el mar,
Dove el so gran canal se volta in arco
Come un serpe in amor,
Dove nel puro ciel splende San Marco
Tuto luze e color.
O mia Venezia, l'oseleto bianco
No lo scazzar da ti,
Che el torna sconsolà, che el torna stanco
Al nio dei so bei dì!
Fora da la so gabia el vien svolando
Fino al to caro sen,
Nel so longo sofrir desiderando
La to pase, el to ben.
El Signor gà volsuo che per incanto
El torna in libertà;
El fio lontan che ti ciamavi tanto,
Venezia, ecolo qua!
Tientelo in brazzo ti, Venezia mia,
Sto povaro oselin,
Che no 'l possa mai più scamparte via
Ramengo e pelegrin
E se ti el voto acoglier ti podessi
Del to oselin fedel...
Sepelisselo ti sotto i cipressi
E i fiori, a San Michel!