A Rialto
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Carmen baccellare | Edission e fonte ▼ | L'oselo → |
.jpg)
DAL ponte de Rialto
Se vede un omo in alto
Che par ch'el diga – son qua mi, paroni!
E ben che in bronzo negro,
El gà un museto alegro,
El baston, la peruca, e 'l xe Goldoni.
Lo visita i colombi
Che cala zo dai Piombi
E i se ghe ferma adosso, povareto,
Ch'el gà capelo e spale
Pieni de macie zale
E bianche... Là! Purtropo el xe sporcheto!
E mi quando passava
Dal Campo, me fermava
Cussì, come per dirghe ― adio, fradèlo! —
E se no fusse stà
Per el Patriarcà,
La creda, me sarìa cavà el capelo,
E andava via pensando,
Non a Corado Brando,
Ma a Florindo, Rosaura e Pantalon,
Che i preti tuti quanti
Xe un poco comedianti
E la parte i la recita benon.
Goldoni caro!... E adesso
Mi me domando spesso
Che comedie el farìa serà qua drento,
Perchè, se fazzo el conto,
El trovarìa za pronto
La scena, i personaggi e l'argomento.
El Frapador, l'Avaro,
I Rusteghi, el Busiaro,
El Dotor, Arlechin, Marzio, Brighela,
I xe qua tuti quanti
Vivi, veri, parlanti,
Se ben che la comedia no sia bela.
E se ghe vol le done,
Ghè tante buscarone
De devote che spuzza de scapini
Da stomegar magari
Un branco de somari,
O una barca de frati capuzzini.
Ma si, lo so e lo scrivo
Che se 'l tornasse vivo
El me farìa in comedia senza falo.
Sicuro e me ne stimo
E nol saràve el primo
Mincionador che me tirasse in balo.
Goldoni el giera un omo
De genio, un galantomo
Degno d'esser portà fino a le stele
E me fa specie come
I gàbia dà el so nome
A un articolo igienico de pele.