Sfogonada
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← L'oselo | Edission e fonte ▼ | Do vilegiature → |
.jpg)
Misisti iram tuam et furo rem tuum super nos.
Barvch. II, 20.
SON irabià!! Vorli saver per cossa?
Xe per via de sto fiol de bona dona
De Montagnin che la gà fata grossa!
Se pol farme un'azion più mascalzona
Che consegnar la mia sagra scritura
In man de sta canagia buzarona?
El xe un vero pecà contro natura!
Che s'el sperasse d'esser Cardinal,
Se vedaremo, no gavèr paura!
Ma intanto le mie carte e 'l so giornal
Xe in man de Clemanzù e Satobriàn
E chi sà come i ride in Quirinal!
Chi sà? I Franzesi balarà el cancan
Perchè gò scrito un caro, senza l'aca
E sigilà la letera col pan.
Cossa vorli! La scienza no se taca
Ne la testa de un prete de campagna
Co' fa le giozze de la ceralaca...
Ceralaca? O se dise ceraspagna?
Sia malegnazo sta mitologia
Che debòto me rompe... la fitagna!
Basta; a monte, putei; tiremo via
E tornemo a sto povaro perlato
Vitima de la so... cordoneria.
La varda un poco! El gà spedìo el retrato
De la Sara Bernàr vestia d'Amleto
Che, se i lo vede, i me farà un ricato.
Le done pie me gavarà in sospeto
E, in rason capoversa, quel afàr
Gèra d'un nostro scoazzèr segreto!
Cossa me... importa a mi Sara Bernàr?
Xe sta massada de Separazion
Che la xe un osso duro da biassàr.
Pazienza per la Santa Religion!
Quela fa nozze co ghe xe batalgia;
Ma el mal xe i bezi e le Congregazion,
Che se no fosse sta chietina Italgia
Primagenita filgia de la Chiesa,
Come farave tuta sta canalgia?
Ah, perfida Republica Francesa,
Che almanco con quel can de Bonaparte
Qualche volta magnàvimo d'intesa;
Ma, barona, con ti no conta l'arte
E ti me mandi indrìo sto Montagnini...
Chi se ne... importa? Mi vorìa le carte,
Massa de sanculòti, giacubini,
Antripòfichi, scribi e farisei,
Ladri, turchi, sacrileghi, sassini!...
Ma semo a Pasqua... Benedictio Dei!...