L'oro

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 444 modifica]
L'ORO.


1Dal momento che Pandora
     In tel muso de la tera
     La pignata à sfracassà,
     Fra i malani saltai fora
     Contra i omeni a far guera
     L'oro el primo s'à mirà.
2No gh'è esempi de barbarie,
     Tradimenti, felonie;
     Che no 'l gabia cagionà:
     Per lu ai popoli le angarie,
     Per lu ingiuste prigionie,
     Per lu el saco a le cità.
3E sortida la licenza,
     Fia carnal del tropo lusso,
     Tuto el mondo s'à infetà:
     Adio onor, adio inocenza!
     Al pestifero so influsso
     La s'à in fango trasformà.
4Pare e fio, tacai in barufa,
     Tante volte i xe arivai

[p. 445 modifica]

     L'arme inique a doparar:
     La giustizia, tuta fufa,
     A veder tanti pecai,
     La s'è andada a soterar,
5Questi, e mile, che 'l ribrezzo
     Me tratien de far parola,
     I xe i fruti del metal,
     Che mi vardo co disprezzo,
     Benchè a tuti el fazza gola,
     Come balsemo vital.
6Ma, me pento; cossa digo?
     No 'l credè, no è minga l'oro
     Dei disordini rason:
     L'è dei boni bon amigo,
     L'è el più nobile laoro,
     Che natura fa in scondon;
7Che se contro ogni dirito
     A eseguir cosse mostruose
     El se lassa doparar:
     No per questo contradito
     L'à a chi in opere pietose
     L'à volesto consumar.
8Per mandarghe a le contrade
     Tuto quelo, che ghe manca,
     Qua el tragheta l'alto mar:
     Là minuto per le strade
     El va in ziro a drita, e a zanca
     L'industrioso a compensar.
9Qua el s'inalza in monumenti
     De real munificenza
     Ogni infermo a medicar:
     Dai pericoli, e dai stenti
     La miseria, e l'inocenza
     Là l'è pronto a rancurar;
10E foresta, vale, e monte,
     Campo, pra, fiume, colina
     Conta assae sul so favor.
     L'oro l'è el camaleonte,
     Che dai corpi che 'l vicina,
     Perde, acquista, mua color.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=L%27oro&oldid=42087"