L'indispensabile introduzion

by anonimo

3 L'indispensabile introduzion Marco e Tòdaro Avvertimento degli editori I. Amor ghe vede anonimo 1886 XIX Poesie

Indice:Marco e Tòdaro.djvu

Anonimo ―  Marco e Tòdaro

L'indispensabile introduzion

1886

Edission original:	Anonimo, Marco e Tòdaro, versi in vernacolo venezian de un mestro de Canaregio, Venezia, tipografia antica ditta Cordela, 1886
Fonte:	Indice:Marco e Tòdaro.djvu

←  Avvertimento degli editori

Edission e fonte ▼

I. Amor ghe vede  →

L'INDISPENSABILE INTRODUZION

Xe pregiudizio
De certa zente,
Che pur se calcola
4Savia e prudente,

Credar ch'el spirito
Scrivendo, sia
Quasi sinonimo
8De porcaria,

E che el vernacolo
Deva a ogni pato
Sbrissar¹ nel fetido,
12Opur nel mato.

A mi sta massima,
Sto paradosso,
Le catorigole²
16M'à sempre mosso;

E mai de vèdarghe
Una rason
Gnanca da zovene
20No so sta bon.
 
Come?... Xe insipido
Un galantomo
Se nol desmèntega
24De esser omo?
 
Se nol se inzácola³
Quasi a ogni passo,
Se nol se impétola⁴
28Tuto de grasso?

Se del linguagio,
Per aver sal,
Nol core imprestio
32Da un anemal?

No, cari critici,
Nè cruo, nè coto,
No posso ingiótarlo
36Sto becanoto.
 
E po' go el récipe
Per mio conforto
De mile esempii
40Che ve dà torto.
 
Ma dunque, Labia,⁵
Garzoni, Griti,
Co' tanti apóloghi
44Neti e puliti,

Ma dunque Barbaro,
Pastò, Burati,
Nalin, ecetera,
48Xei sempre mati?....
 
O gáli spirito
Solo in quel caso
Che in Baco o in Venere
52I peta el naso?

No, cari critici,
Metéla via:
Quel vostro cánone
56Xe un eresia.

Fermo, fermissimo
In sta opinion,
Mi, da mestrucolo
60Come che son,

La prova in picolo
Volendo far,
Ste quatro chiácole
64Mando a stampar.

Piasarà el genere?
Gnente de megio:
Sarò la gloria
68De Canaregio!
 
Fazzo una tombola,
No ghe riesso?..
Tanto el principio
72Resta l'istesso.

La mia disgrazia
(Tignilo a mente)
Contro el vernácolo
76No prova gnente.

Tuto al più el publico,
Dovarà dir
Questo che antécipo
80Qua per finir:
 
«No xe la musica,
No xe el violon:
Xe el soramànego⁶
84Che no xe bon! — »

---

Note a cura de l'autor

1. sbrissar - scivolare, sdrucciolare.
2. catorigole - solletico.
3. inzacola - lorda di fango.
4. impetola - invischia, inzafarda.
5. Autori che scrissero in dialetto veneziano.
6. Soramanego - metaforicamente e per ischerzo dicesi della mano dell'artista, massime quando è imperita — Letteralmente ciò che sta sopra il manico dell'arnese o strumento.