L'ignorante (Andando a bisegar)
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El biglieto | Edission e fonte ▼ | El re zucon → |
Andando a bisegar
Nele carte lassae da un mio parente,
Che à corso la cariera militar,
E che meritamente
5Gera capotamburo deventà,
L'anedoto ò trovà
Che digo adesso,
Sento in cativa prosa da lu stesso.
Del mile, se no falo, e cinquecento,
10Val a dir za tresento
E tanti ani,
Nela famosa guera
Fra turchi e veneziani,
Al servizio ghe gera
15Dei secondi
Un caporal schiaon
De nome Spiridion
Sculazzamondi;
Un otimo soldà
20Coragioso al de là,
Ardito, intraprendente,
E a tuto indiferente,
Ma un ignorante tal,
Che da quando gh'è mondo
25No s'à mai dà l'egual,
E stentarà a vegnirghene un secondo.
Sina che 'l gera drio
A baterse da can,
Contro de tre che no à magna più pan,
30Da un quarto è stà colpio
Nel brazzo dreto
Co una bala spietata de moscheto
Che ga sbusà la carne, e che incastrada
Mezza drento de l'osso gh'è restada.
35Sentà sora un canon co gran pazienza,
No chiamando nissun che lo socora,
Co tuta la più freda indiferenza
Sculazzamondi se la cava fora,
Ghe dà una gran forbia,
40E se la mete via;
Se liga suso el brazzo
Co un fazzoleto strazzo
Che 'l gaveva in giberna,
El se mete a fumar
45E dopo va a cercar
Chi lo governa.
Difati un certo Momolo Patata,
Da poco tempo dotora à Pavia,
Chirurgo de ambulanza nel'armata,
50Che osserva la feria,
E coi feri de l'arte,
E studio grando,
Va da tute le parte
Furegando.
55Senza che diga gnente
El povaro paziente,
Senza che 'l fassa moto
Una grossa mezz'ora
Patata lo tien soto,
60E soto el saria ancora
Le man de quel macaco
Se alfin impazientà,
Avendose fumà
Tuto el tabaco,
65No l'avess'esclamà
— Poter de dia!
A meterghe le taste a una feria
Quanto mai stala? —
Alora quel dotor — cerco la bala.—
70Ridendoghe in tel muso
Spiridion salta suso:
— Perchè no dirlo prima cara ela?
La bala la go mi drento in scarsela.—
Sto anedoto assae strano
75Fa prova fra le tante,
Che spesso a proprio dano
Agisce l'ignorante.