El re zucon
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← L'ignorante | Edission e fonte ▼ | El chierico stolido → |
Se quel che vien contà
No ze falope,
Un'epoca gh'è stà,
Che i re gera de cope,
5De spade, de danari e de bastoni,
Ossia, messo da parte
El mazzo de le carte,
I gera re indolenti o re meloni,
Che avendo in cesto el stato,
10In t'un ozio beato
Da invidiar
Se serviva del trono
Qualche dopodisnar
Per far un sono;
15I magnava, i beveva,
Ma no i contava un zero,
Perchè tuto faceva
El ministero,
Al qual gera per altro
20Unicamente amesso
L'omo severo e scaltro,
Sistema che ze adesso
In forza de l'età
Tuto quanto cambià,
25Essendo da sti ani
De talento i sovrani,
E al ben propensi
Dei popoli sogeti
Co ministri discreti
30In tuti i sensi.
Premesse ste nozion
Per i ignoranti,
Che a nostra confusion
Ghe ne ze tanti,
35Anzi, le lassa
Che lo diga sul serio,
Secondo el mio criterio
Ghe n'è massa,
Un re de la Turchia,
40Karakakoni,
De la categoria
Dei re meloni,
Su sto raporto quelo,
Che chiamar se podeva
45Fra i vari ch'esisteva
Re modelo,
Davanti del camin
Per passar l'oca,
Co la so pipa in boca
50Se scaldava el martin
De crudo inverno
Insieme al so ministro de l'interno,
Omo per acidente
Colto bastantemente,
55El qual, ligio al divieto
De discorer d'afari a so maestà,
In segno de rispeto
l'argomento à acampà
Vechio oramai,
60Che quanti ghe ze stai,
Quanti che semo,
Tuti a qualche animal ghe somegemo.
El re, testa de quele
Che ze faglio cervele,
65Tardandolo in tel muso
In modo caricato,
E ridendo da mato,
El salta suso:
— Amesso come vero
70L'assunto in discussìon,
A parlarghe sincero
Ela, mio caro,
Per tute le rason
Ghe somegia a un somaro,
75Anzi co sto animal
Per parer mio,
No la se n'abia a mal,
La ze un pomo spartio. —
Ma quel ministro pronto
80Ghe risponde a l'afronto:
— Che a sto animal somegia
No me fasso nissuna maravegia,
Se de rapresentar vostra maestà
A più de qualche corte
85Mi go avudo in passà
La bela sorte. —
Sicome l'ignorante co frequenza
Tol la graziosità per insolenza,
E tol la vilania
90Per una cortesia,
El re zucon sto fin ragionamento
L'à tolto in falo per un complimento.