Istà
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Primavera | Edission e fonte ▼ | Autunno cittadin, e campestre → |
La Libia ha spalancà le so dogane,
E netto da gabelle el caldo vien,
Za la stagion sentir fa le fumane,
E a nu troppo vicin Febo se tien,
Voi dir con tutta quanta sta seccada
Che la stagion d'istà xe capitada.
Troppo desfortunai sentimentali,
Ecco el tempo de far cure perfete,
E nelle onnipotenti acque termali
De cercarse e trovar salute, e quiete,
Chi ga dogie, e camina o strupio, o zoto
Fazza dunque per Abano fagoto 1.
Oltre alla sanità che vien promessa
Da un rimedio de lusso, predicà
Bon per tutti i malani, in quella istessa
Dimora felicissima se ga
Mille, e mille aventure ogni qual trato,
Che fa bello quel logo, o manco ingrato.
E mi che tutto ho cognossù l'impianto
De un paese del qual son cittadin,
Perchè in quello alla longa ho speso, e spanto
Senza trovarghe ai mali mii confin,
Libero posso dir la me opinion,
E de tutto formar la descrizion.
Ghe battarìa de spuzze, e de vapori,
Che tien oppresso eternamente el fià,
Ghe fonteghi de reumi, e de dolori,
D'erpeti, e de magagne in quantità,
E va zirando altero in quel paese
L'ancuo cosmopolita umor franzese.
E xe per lu ogni zorno carneval,
Mentre in mascara el corre ogni momento,
Ora el deventa dogia accidental,
Vertigine, o fumana, svanimento,
O gentilizio insulto, o mal contratto
Dall'aria, da un patèma, o da un contatto.
Ma nol cambia sostanza, e un ben accorto
Medego mai no cambia medesina,
E la radise americana, a torto
Squasi mai per combattarlo el destina,
Che sussidiada ben dai fanghi, e bagni
Certi la fa su quell'umor guadagni.
Nè i mali soli in mascara se mette,
Ma chi xe da sti mali oppressi ancora,
E giusto un passatempo el se ripete
Dai foresti che riva ogni mezz'ora,
E che appena lassadi i so paesi
Là a intitolarse i vien conti e marchesi.
Xe quello el logo dove impunemente
Pol darse ton qualunque figurotto,
Dove che per marìo passa el parente,
Dove ricco se crede anca el più rotto
Dove la mantegnua passa per dama,
Dove contessa una massera i chiama.
Xe là dove se spende a larga man
I titoli de conte, e d'eccellenza:
Conte xe el gato, xe eccellenza el can
Gnessuno in somma, va a restar mai senza,
E se ghe sia un soggetto anca abietissimo
Scuode, col sappia far, dell'illustrissimo.
Oh quanti credo per aver sto ben
Per esser patentai da un camarier,
O i riva apposta, o molto i se trattien!
E oh quante pur maestre nel mestier
De scondar chi le sia sinceramente,
Trapola svelte l'inesperta zente.
A proposito qua capita un caso
Che a un sedicente svelto è nato un dì,
E del qual no sarìa sta persuaso,
Se no ghe fosse in parte entrà anca mi;
Caso che molto ben tende a provar
Quel che fin qua m'ha piasso de contar.
Avea condotto a divertirse un toco
Co mi una dogia che ho sposà da putto,
Dogia che per averla ho speso poco,
Ma che presto l'andava a costar tutto,
Se per ridurla un fià manco insolente,
In Abano no andava, e prestamente.
Là contentada in ogni so caprizio
Carezzar la facea pien de premura,
Là tisane, là bagni a precipizio,
Là ceroti, là fanghi, e là ogni cura,
E credè pur che frotole no scrivo,
Go dà fin per quietarla arzento vivo.
Ma dei me sforzi mai ben sodisfada
Anzi più ingrata quanto più facea,
L'avarìa mille volte abbandonada,
Ma el lassarla da mi no dipendea
E intanto fra st'insulti, e st'insolenza
Me predicava el sior dottor; pazienza.
Mentre co sta mia barbara compagna
Parte facea d'una conversazion,
Dove sempre qualcun ghe che se laġria,
Nè se canta de guai che la canzon;
Un pochetto de spasso me procura,
Una secondo mi nova aventura.
Da fresco ai bagni capitada gera
Una tal, co una vecchia, e un zovenotto,
E tutti tre che per la sola ciera,
S'avarìa lucrà molto a far casotto
E la zovene mi za a prima vista
L'ho stabilida una venal conquista.
Da falsi, e boni aurei ornamenti oppressa
Più carne che vestiario espone in vista,
Industre pompa ch'el mestier confessa
De far de cuchi subito provvista;
La tira in rede co un saludo, e par
Che la vogia l'amor ben trafegar.
E questa vol el pien della locanda,
Che de quel putto la consorte sia;
Lodato Dio, lassemola da banda,
Za più tardi farò l'ispezion mia;
Intanto so che per marìo l'al chiama,
E par la vecchia che la sia la mamma.
Descriverò la mamma: alta, e grassota
Dentro a un negro andriè tutta ravolta,
Un viso longo, un viso da marmota,
Ma che pur mostra dell'astuzia, e molta,
Sacerdotessa favorìa de Bacco,
E corsara da soldi, e da tabacco.
No passa minga quattro dì, che un puto
Forma co tutti tre gran conoscenza;
Beato de sta cossa el xe per tutto,
E i se tratta co tanta confidenza,
Che i pareva strettissimi parenti,
O da un secolo almanco conoscenti.
L'amigo sempre più se scalda i feri,
E quell'altro a mostrar va gelosia;
La signora sospira, e in gran pensieri
Chi ghe stasse a badar la credarìa,
E alla mamma el dolor pesa cussì,
Che no la disna che do volte al dì.
Za el nostro gazettin della locanda
Profetizava una formal rottura,
Za stava tutti co una smania granda
De conossar el fin dell'aventura,
Quando se sente a dir ch'el sior marìo
Partir deve dai bagni el zorno drio.
A sta nova i maladi i se strassina
Da una camara all'altra, e i fa comploto,
Tanto più, quando i sa che madamina
De no movarse gnanca la dà moto,
E ch'el marido, della mamma in cura
Lassa per qualche dì sta creatura.
Felice viazzo, xe quel sior partìo
Dopo ogni cossa aver disposta in testa:
Baccante d'allegrezza el puto mio
Vede per lu che l'indoman xe festa,
Se nol ga spini, e se la vecchia in sacco
A consegnarla val, vin, e tabacco.
Za la notte che in Abano apparisce
Un'ora e forse più prima de sera,
Se la luse se perde, e se smarisce
Dalla pesante oppressa atmosfera,
Chiama, e rancura in un istesso site
Quel de carogne numero infinito.
E za anca tutti a ronchizar s'ha messo,
Che in sfesa della porta, e in sentinella
Stago a vardar s'el transito permesso
Da una camera all'altra abbia la bella,
E quando el xe verificà me meto
Tutto a osservar da un provido buseto.
Musa con una toa cotola strazza
Quel che ti credi più scondi prudente,
E lassa el quadro che a vardar me fazza
Nella parte che sia più concludente,
Mentre za el resto per quel fià de mondo
Che m'ho acquistà, mi lo conosso a fondo.
Ma l'affar va longhetto, e ben comprendo
Che la visita i spetta dell'aurora,
Co la qual sicurissimo facendo
Marenda in prima, e sie parole ancora,
Se mi stago a spettar che sia finìo
Resto là duro fin al zorno drio.
Sulla fronte del zovene amoroso
All'indoman xe scritta la vittoria,
La bella nel penar trova riposo,
Xe la mamma modesta in tanta gloria,
La borsa, i cuori, e 'l conto d'ostaria
Pretende Amor che in uno unidi i sia.
Le cosse andava ben d'una maniera,
Che megio andar no le podea sicuro:
Quell'altro el s'attendea da ancuo a stassera,
E a nu vedar premea quel muso duro,
Quandocchè in logo soo vien per espresso
Un fogio a nome del mio amigo istesso.
Ecco parola più, parola manco
Quello che nel fatal fogio ghe giera:
» Amico mio!.... di posseder già stanco
» La bella che passò per mia mogliera,
» E smorbato assai più d'una mammaccia
» D'ambo un regalo è giusto che vi faccia.
» Godetele buon uomo in santa pace;
» Che volontieri a voi tutte le dono,
» E se il tenerle troppo vi dispiace,
» Lasciatele partir, che avvezze sono
» A ramingar da scaltre, e tal che in fondo
» Le si ponno chiamar donne di mondo.
Chi podarìa mai dir la confusion
De quelle do castissime matrone,
Chi la rabia, e 'l dolor del nostro Adon
Che in presenza de trenta e più persone,
Guadagna del macaco a crepa panza,
E infin dall'osto che una summa avanza.
Ma l'amara ingiottir pilola toca
E quel conto saldar, ch'ha unido amor;
El ga fogo nell'occhio, e fogo in boca
El morsega, el biastema, el va in furor,
Tanto più che per farlo capucin
Ghe della mamma un contesel de vin.
Fatto fagoto, eccolo in posta presto,
E diretto no so per qual paese,
Nè quelle do colombe l'ha volesto
Dolente troppo delle fatte spese,
E madame vegnue con tanto lusso,
Credo a caval le sia partìe d'un musso.
Da quella volta in qua, se me vien fato
De trovarme in sti loghi assae sospetti,
Sempre avendo in memoria el caso nato,
Squadro nel viso ben tutti i soggetti,
Naso se del vazin sento l'udor,
Giusto fra i titoladi, e fra l'onor.
- Note
- ↑ Alle Terme d'Abano.