Insonnia
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Ciacole d'ocasion | Edission e fonte ▼ | Visita → |
.jpg)
Dormi, fanciul, non piangere...
A. Manzoni, Il Natale.
Mo cossa vorlo mai? Con sto siroco
Mi no posso dormir.
Trentasie gradi, ciò! Diselo poco?
Xè roba da morir!
Se pò se beve un goto d'acqua in gelo
Se suda a la dirota;
Suda i freschi persin de Rafaelo...
Freschi i ghe dise? — I scota!!
La carega xe come una graèla
Che gà soto i carboni;
El leto po' xe come la paèla
Che rostisse i maroni
E se in tera ghe xe de sti calori,
Figurarse l'inferno!
Che gran meditazion pei pecatori
E anca per el Governo!
Basta! A Venezia almen nel caldo grande
E ne l'ore più ingrate
Giera paron de metarme in mudande
E de andar in zavate.
Ma qua!! Solo che slazza i centurini
Del mio donzelon bianco,
Ecco m'ariva adosso i pelegrini
De Maròstega in branco.
E qua ciàcole, inchini e discorseto
Con l'aria de bravura...
Lo so; bisogna farghe un zerto efeto.
Ma, Dio, che secatura!
E dopo, straco morto e malcontento
Come un can bastonà,
Togo l'Oservator per farme vento
E casco sul sofà,
Pensando con le lagrime nel cor
Che l'altra note zerto
Tuta Venezia andava al Redentor,
Che ghe giera el concerto,
E foghi artificiai sui galegianti,
Lumiere in ogni posto,
Alegria, libertà, stendardi, canti
E assae polastri a rosto.
Ah, la Zuèca e quele cale ombrose
Dove se pensa ai morti,
E l'odor de garofoli e de riose
Drento al fresco dei orti!
Soto la luna bianca e confidente
Slissa le gondolete;
Ne l'ombra, da lontan, ride la zente,
Ride le canzonete.
Tutti i ride e mi solo a denti suti
Tribolo e pianzo ancùo!
Dunque la libertà Dio la dà a tuti
Men che al Vicario suo?
Ma dunque el gà inventà per carcerarte
Ste do gran Sante Chiavi?...
Tasi, povaro Bepi! A ralegrarte
Ecco i Vescovi slavi!