Inno all'Ignoranza
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte prima, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 1.djvu |
| ← Dedica | Edission e fonte ▼ | Nascita e avventure d'una Moneta di Genova → |
Santa Ignoranza, bona Dea che a sguazzo
Oro e arzento ti doni ai to divoti,
Umilmente ai to pie Dea mi me fazzo
Per confessarme, e pronunziar dei voti,
E se al to culto no m'ho tratto in brazzo
Per seguir el partìo d'omeni doti,
I effetti ho visti, ho cognossù l'error,
Son qua pentido a lagremar de cuor.
Tutta la colpa no pol dirse mia
Se a studiar me son messo in qualche pressa,
Anzi nato, e cressù mi me sentìa
Per poder superar l'azidia istessa;
Aveva la più rara antipatia
Per ogni studio nel mio cuor impressa,
E s'el Fato no gera a mi sinistro,
Esser podeva un too primo ministro.
Per farme disertar da un culto grando
E dai to santi, e fortunadi altari,
El Mestro me tegnia de quando in quando
Senza aver carità cene e disnari,
In famegia l'andava sussurando
Ch'el pezo no l'avea fra i so scolari,
E in scuola se tegniva a mi vicin,
L'aseno deventà mio beniamin.
Vegnù grandetto a frequentar m'ho messo
Più de qualche genial conversazion,
Persone d'ogni stato, e d'ogni sesso
In mi vedeva un classico minchion,
Talchè dai scherzi, e dai rimarchi oppresso
Chiamando a concistoro la rason
Ho dito, dunque a farme rispettar
Un vestir parigin no ha da bastar?
Fatal riflesso!.... da quel ponto in botta
Nei studj immerso go cambià partìo,
E no avendo el cervel della marmotta
Qualche piccolo frutto ho conseguìo:
Una Musa picante, e zovenotta
Per maggior danno se m'ha messo drio,
E sepellido in mille cure amene
Passava allegri dì, notte serene.
Fortuna intanto che de starme arente
La s'aveva moltissimo stufà,
Trovandome ai so vezzi indifferente
E a chi ghe xe nemigo affezionà,
Trattandome da mato, e da imprudente
M'ha le spalle in un atomo voltà,
M'ha chiuso de risorsa ogni altra strada....
Dio difenda da donna inanemada.
Ridotto al caso de cercar panetto
De trar profitto dei me studj fati,
Santa Ignoranza ho cognossù l'effetto
Che ga quei che con ti se mostra ingrati;
Messo co chi fa soldi ancuo al spaghetto
Perdarla devo oppur ridurme a pati,
E za pur troppo in avegnir no falo
O cambio de bandiera, o resto al palo.
In sto duro conflitto, in sto cimento
Quala sarà quell'anima romana
Che divisa no cambi in un momento
E più la strada se riduga piana
Per procurarse a larga man l'arzento?
Se all'Ignorante piove ancuo la mana,
Se ogni ben la fortuna a lu parecchia,
Torno suddito too divina vecchia.
Ho brusà libri, e scartafazzi, e carte,
Ho rifudà qualunque associazion,
In questa ho scritto, e pò in quell'altra parte
No voi carteggio più de sta rason,
E se possa un servizio ancora farte
Confinarò el bon senso in un canton,
O assegnighe pur ti l'itinerario,
Za nol trovo gran fatto necessario.
Adesso parlarò da bon mortal
Come in antico m'ha insegnà la nena,
Dirò quello che credo o ben o mal
Nè de pensarghe vogio aver la pena,
Serivarò in modo lisso, e natural
E se ghe de' strambotti una dozzena,
Mi no vago a cazzarme in burattina
Per separar la crusca, e la farina.
Per ti Ignoranza godarò el sembiante
Della nostra comun mare natura,
I animali, l'erbette, i osei, le piante,
I fonti, i ruscelletti, e la verdura,
Ma senza po saver de tante, e tante
Cosse che vedo la rason oscura:
Quando per queste magno, e vivo ben,
Pensarghe tanto sù no me convien.
Sia che risplenda el sol lucido, e chiaro,
Sia che sporco apparissa el firmamento,
Se xe d'inverno meto su el tabaro,
Se xe in istà mi suo nè me sgomento,
Ma per questo no cerco, e non imparo
La minima rason d'un cambiamento:
Se la terra se volta a gambe in sù,
Piego dalla so parte, e gnente più.
E no farò la solita matada
De cercar telescopi, e canociai,
Dei astri per capir qual sia la strada;
Per saver dove i xe, dove i xe stai
La luna vedarò tonda, o tagiada
Senza po imbarazzarme e cercar mai
Se ghe abitanti, o donne de bon cuor,
Che za co mi no farà mai l'amor.
1
So che son vivo, nè cercar m'imbrogio
La natura dell'anima; e se penso
Per quelle idee che go, saver no vogio
Se le sia innate, oppur fiole del senso:
Monadi, Spazio, Moto, i xe un gran scogio,
Xe l'effetto e la causa un tedio immenso,
Cosse che quando ben se l'ha imparae
No se aumenta d'un obolo l'entrae.
No vorrò più saver fatti d'eroi,
Che xe crepadi da mil'ani, e mile
Né parlarò come i nemici toi,
Santa Ignoranza d'Alessandro, e Achile;
No i sa quel che succede ai zorni soi
E i tira del passà paste suttile
Me basterà el saver, questa è virtù!
Se i me amici sia sani, e gnente più.
Senza studiar de Tulio l'eloquenza
Dirò in fazza d'ognun la me rason,
Se de' Baldo no go l'alta sapienza
Farò del too, e del mio viva question,
No spuarò a ogni tratto una sentenza,
Me farà d'avvocato el mio baston,
E per Ti o Dea no seccarò ogni volta
L'organo propagante a chi m'ascolta.
Oh quanto è matto mai quel che lontan
Va bona Dea dal tempio too ridente!
Quel che studia, e che fa vita da can,
Quando per carità galo mai gnente?
Uno de pasta grossa, un bon cristian
Che condur vogia i zorni allegramente,
Se a ti el se butta co fiducia in brazzo,
Ga livree, ga cavai, campi, e palazzo.
La smania de saver no lo tavana
Tutto l'ascolta, e à gnente no l'abbada,
El sa buttar a tempo in padovana
Qualche insolenza che ghe vien slanzada;
Sommesso el fa la corte, e nol s'affanna
Lassando tutto andar per la so strada:
Col don da Dio de no capir mai gnente,
L'è grosso, e grasso, e 'l vive allegramente.
Lu dorme, e intanto ghe chi se sfadiga
Per vantaggiarlo in lucro, e nel decoro,
Intrepido per lu lassa che i diga
Purchè i comodi cressa, e piova l'oro:
Finchè po stravacà nella quadriga,
Senza gnessun pensier correndo al soro
Colle livree da drio, par che al viandante
El diga: esco el destin d'un Ignorante.
Lontan da brighe, e da ogni dotta curà,
Disposto de scordar quel ch'ho imparà,
Santa Ignoranza mia vivi sicura
Che no sarò mai più quel che so stà:
Punido del fallir ma con usura
Darà dell'avvegnir norma el passà,
Anzi lassime pur per compagnia
L'ozio, e la to fedel poltroneria.
Vestidi tutti tre da parigini
In mezzo a mille comodi de vita,
In possesso de talari, e zecchini
Sarà la nostra compagnia gradita:
I grandi, le matrone, e i milordini
Ne farà riverenza a storta e drita,
Chiaparò intanto d'Ignorante el ton,
E farò me prometto un figuron.
.jpg)